ໂຄງການຄົ້ນຄວ້ານໍາໃຊ້ເຕັກໂນໂລຊີສະໜອງນໍ້າແບບປະສົມປະສານ ເພື່ອຮັບໃຊ້ການຜະລິດກະສິກໍາ ຢູ່ເມືອງສະໜາມໄຊ, ແຂວງອັດຕະປື ໄດ້ຮັບງົບປະມານຈາກກອງທືນພັດທະນາວິທະຍາສາດ ແລະ ເຕັກໂນໂລຊີ ໂດຍແມ່ນກົມເຕັກໂນໂລຊີ ແລະ ນະວັດຕະກໍາ, ກະຊວງເຕັກໂນໂລຊີ ແລະ ການສື່ສານ ພ້ອມດ້ວຍຄະນະຮັບຜິດຊອບຂັ້ນແຂວງ ໂດຍນຳໃຊ້ວິຊາການພາຍໃນ ເປັນຜູ້ສໍາຫຼວດ ແລະ ຈັດຕັ້ງປະຕິບັດ ຊຶ່ງຈຸດປະສົງຂອງໂຄງການແມ່ນເພື່ອແກ້ໄຂບັນຫາການຂາດແຄນນໍ້າ ແລະ ໄພນໍ້າຖ້ວມສໍາລັບພື້ນທີ່ການຜະລິດກະສິກຳ ໃນເຂດເປົ້າໝາຍ ຄື: ເຂດເນື້ອທີ່ກະສິກໍາບຸກເບີກໃໝ່ດົງບາກ, ເຂດປູກເຂົ້າບ້ານໃໝ່ ແລະ ບ້ານຄັງ ຢູ່ ເມືອງສະໜາມໄຊ, ແຂວງອັດຕະປື ໂດຍໄດ້ສ້າງຕົວແບບລະບົບການສະໜອງນໍ້າແບບປະສົມປະສານ ຊຶ່ງໄດ້ມີການສໍາຫຼວດລະອຽດ, ອອກແບບລະບົບການບໍລິຫານຈັດການນໍ້າ ແລະ ລະບົບປໍ້ານໍ້າໂຊລ່າສູບນໍ້າພະລັງງານແສງຕາເວັນ ເຊັ່ນ: ການສ້າງອ່າງເກັບນ້ຳໃນພື້ນທີ່, ການສູບນໍ້າໃຕ້ດິນເຕີມເຂົ້າອ່າງດ້ວຍລະບົບປໍ້ານໍ້າພະລັງງານແສງຕາເວັນ, ການສ້າງທະນາຄານນໍ້າໃຕ້ດິນ, ສະໜອງເຕັກໂນໂລຊີຜະລິດນໍ້າດື່ມໃຫ້ແກ່ໂຮງຮຽນ ແລະ ການນໍາໃຊ້ກະເສດທິດສະດີໃໝ່.
ໂຄງການດັ່ງກ່າວເປັນໂຄງການໜຶ່ງທີ່ຈໍາເປັນຕ້ອງໄດ້ຈັດຕັ້ງປະຕິບັດຢ່າງຮີບດ່ວນເພື່ອເປັນການພື້ນຟູ ແລະ ພັດທະນາຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບຈາກເຂື່ອນເຊປຽນ-ເຊນ້ຳນ້ອຍແຕກໃນປີ 2019 ໂຄງການດັ່ງກ່າວເປັນບູລິມະສິດສຳຄັນຂອງລັດຖະບານ ຊຶ່ງໄດ້ເລີ່ມຈັດຕັ້ງປະຕິບັດມາ ແຕ່ທ້າຍປີ 2020 ໂດຍໄດ້ແບ່ງ 3 ໄລຍະຄື: ສຳຫຼວດອອກແບບ, ກໍ່ສ້າງຕິດຕັ້ງ ແລະ ຝຶກອົບຮົມສະຫະກອນຜູ້ເຮັດການຜະລິດ. ພາຍຫຼັງໄດ້ສຳເລັດການສຳຫຼວດແລ້ວແມ່ນໄດ້ເລີ່ມຈັດຕັ້ງປະຕິບັດບັນດາກິດຈະກຳໂດຍສະເພາະແມ່ນໄດ້ເລີ່ມກໍ່ສ້າງອ່າງກັກເກັບນ້ຳ ຈຳນວນ 3 ອ່າງ ແລະ ຂຸດລອກໜອງຫຼັກ ຈໍານວນ 1 ອ່າງ ແຕ່ເດືອນ 4 / 2021 ຈົນມາຮອດ ເດືອນ 4 / 2022 ຈຶ່ງໄດ້ກໍ່ສ້າງອ່າງສໍາເລັດ ຄື: ອ່າງເກັບກັກນໍ້າຈຸດທີ 1 (ເຂດສວນມັນ), ອ່າງເກັບກັກນໍ້າຈຸດທີ 2 (ເຂດໜອງແປນ), ອ່າງເກັບກັກນໍ້າຈຸດທີ 3 (ເຂດສ່ວນຫຍ້າ) ແລະ ອ່າງກັກເກັບນໍ້າຈຸດທີ 4 ( ຂຸດລອກໜອງຫຼັກ ), ໄດ້ສໍາເລັດເຈາະນໍ້າບາດານ ແລະ ຕິດຕັ້ງລະບົບສູບນໍ້າໄຟຟ້າແສງຕາເວັນ ຂະໜາດ 14,4 KW ຈໍານວນ 8 ຈຸດ ເຂດດົງບາກ 06 ຈຸດ, ເຂດບ້ານໃໝ່(ທ່າຫີນ) 01 ຈຸດ ແລະ ເຂດບ້ານຄັງ ຈໍານວນ 01 ຈຸດ. ພ້ອມນັ້ນ, ໄດ້ຕິດຕັ້ງເຄື່ອງກັ່ນຕອງນໍ້າສະອາດ ຈໍານວນ 05 ຊຸດ ຄື: ໂຮງຮຽນ ມສ ສະໜາມໄຊ ຈໍານວນ 1 ຊຸດ, ໂຮງຮຽນ ປະຖົມດົງບາກໃໝ່ ຫີນຄໍາ ຈໍານວນ 1 ຊຸດ, ໂຮງຮຽນ ປະຖົມດອນບົກໃໝ່ ທ່າແສງຈັນ ຈໍານວນ 1 ຊຸດ, ໂຮງຮຽນ ປະຖົມຫີນລາດໃໝ່ ຕະມໍຢອດ ຈໍານວນ 1 ຊຸດ ແລະ ໂຮງຮຽນ ປະຖົມສະໜອງໃຕ້ ປິນດົງ ຈໍານວນ 1 ຊຸດ.
ພາຍຫຼັງການຈັດຕັ້ງປະຕິບັດໂຄງການດັ່ງກ່າວແລ້ວຈະຊ່ວຍປັບປຸງຊີວິດການເປັນຢູ່ຂອງປະຊາຊົນຢູ່ເມືອງສະໜາມໄຊໃຫ້ດີຂຶ້ນ ເຊັ່ນ: ເປັນການນໍາໃຊ້ວິທະຍາສາດ ແລະ ເຕັກໂນໂລຊີ ທີ່ທັນສະໄໝ ເພື່ອການບໍລິຫານຈັດການນໍ້າ(ລະດູແລງ, ລະດູຝົນ ແລະ ເກັບນໍ້າໄວ້ໃຊ້), ມີລະບົບສະໜອງນໍ້າໃຫ້ເຂດການຜະລິດກະສິກໍາ ໃນລະດູແລ້ງ, ມີຄະນະກໍາມະການຄຸ້ມຄອງບໍລິຫານຈັດການນໍ້າຂອງຊຸມຊົນ, ປະຊາຊົນມີລາຍຮັບສາມາດເຮັດການຜະລິດໄດ້ໃນລະດູແລ້ງ, ມີນໍ້າດື່ມສະອາດໃຫ້ຄູ ແລະນັກຮຽນ ໂດຍບໍ່ໄດ້ເສຍຄ່າໃຊ້ຈ່າຍ, ປະຊາຊົນມີຄວາມສາມາດໃນການຄຸ້ມຄອງຊັບພະຍາກອນນໍ້າຂອງທ້ອງຖິ່ນ ເພື່ອຮັບປະກັນການພັດທະນາໃນເຂດຊົນນະບົດ, ຮັບມືຕໍ່ການປ່ຽນແປງດິນຟ້າອາກາດ ແລະ ການຫຼຸດຜ່ອນຄວາມສ່ຽງໄພພິບັດ, ເປັນຕົວແບບທີ່ດີ ໃນການຄຸ້ມຄອງຊັບພະຍາກອນນໍ້າໃນທ້ອງຖິ່ນ ທີ່ກ່ຽວຂ້ອງກັບ ລະບົບການສະໜອງນໍ້າ, ການແກ້ໄຂນໍ້າຖ້ວມ, ໄພແຫ້ງແລ້ງ, ນໍ້າໃຕ້ດິນ, ນໍາໃຊ້ເຕັກໂນໂລຊີ ພະລັງງານທົດແທນ ທີ່ສະອາດ ແລະ ເປັນມິດຕໍ່ສິ່ງແວດລ້ອມ, ປະຊາຊົນສາມາດຂະຫຍາຍຜົນການຜະລິດທາງດ້ານກະສິກໍາ, ເພີ່ມລາຍຮັບ, ແກ້ໄຂຊີວິດການເປັນຢູ່ດີຂື້ນ ແລະ ສ້າງຄວາມໝັ້ນຄົງ ທາງດ້ານສະບຽງອາຫານ ແລະ ເຮັດໃຫ້ການພັດທະນາເສດຖະກິດ – ສັງຄົມ ໃຫ້ມີຄວາມຍືນຍົງ.
ກອງປະຊຸມສະຫຼຸບການຈັດຕັ້ງປະຕິບັດໂຄງການ ແລະ ມອບ-ຮັບໂຄງການ ດັ່ງກ່າວ ໄດ້ຈັດຂຶ້ນໃນຕອນເຊົ້າວັນທີ 01 ກຸມພາ 2023 ທີ່ຫ້ອງວ່າການແຂວງ ອັດຕະປື ໂດຍການເຂົ້າຮ່ວມຂອງທ່ານ ສຸມານະ ຈຸລາມະນີ, ຫົວໜ້າກົມເຕັກໂນໂລຊີ ແລະ ນະວັດຕະກຳ, ກະຊວງເຕັກໂນໂລຊີ ແລະ ການສື່ສານ, ທ່ານ ຂັນທອງ ຍິ້ນດາວົງ, ຫົວໜ້າພະແນກ ເຕັກໂນໂລຊີ ແລະ ການສື່ສານ ແຂວງ ອັດຕະປຶ, ມີບັນດາພະແນກການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໃນຕອນເຊົ້າວັນທີ 2 ມິຖຸນາ 2022 ຄະນະສະຖາບັນຄົ້ນຄວ້າພະລັງງານແລະບໍ່ແຮ່ ໂດຍການນຳພາຂອງ ທ່ານຫົວຫນ້າສະຖາບັນ ທ່ານ ພູວຽງ ແກ້ວບຸບຜາ ເພື່ອຕ້ອນຮັບການເຂົ້າພົບປະຢ້ຽມຢາມ ຂອງຄະນະທີມອົງການ JICA. ເພື່ອປຶກສາຫາລືແລກປ່ຽນກັນ ກ່ຽວກັບໂຄງການ ການຫັນປ່ຽນພະລັງງານ ແລະ ສັງຄົມທີ່ປັດສະຈາກກາກບອນ. ພ້ອມກັນນີ້ ຄະນະທີມງານ ເພີ່ນກໍ່ໄດ້ເຂົ້າຊົມຢ້ຽມຢາມບັນດາຫ້ອງທົດລອງຕ່າງໆຂອງ ສພບ ອີກດ້ວຍ.
ໃນວັນທີ 01/06/2022 ສະຖາບັນຄົ້ນຄ້ວາພະລັງງານ ແລະ ບໍ່ແຮ່ ໄດ້ເຂົ້າຮ່ວມວາງສະແດງຜະລິດຕະພັນ ແລະ ຜົນງານ ໃນງານສະເຫຼີມສະຫຼອງວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ປະຈຳປີ 2022 ພາຍໃຕ້ຫົວຂໍ້ “ເດັກ, ເຍົາວະຊົນເປັນຄົນດີ, ຄົນສະຫຼາດປະເທດຊາດສີວິໄລ” ທີ່ວັງເຍົາວະຊົນ ແລະ ຫໍມູນເຊື້ອຊາວໜຸ່ມ, ບ້ານດົງໝາກຄາຍ, ເມືອງໄຊທານີ, ນະຄອນຫຼວງວຽງຈັນ. ເຊີ່ງໄດ້ເຂົ້າຮ່ວມງານວາງສະແດງໃນຄັ້ງນີ້ມີ ທ່ານ ພູວຽງ ແກ້ວບຸບຜາ ຫົວໜ້າສະຖາບັນ. ພ້ອມດ້ວຍຄະນະສະຖາບັນ, ຫົວໜ້າສູນ ແລະ ພະນັກງານວິຊາການເຂົ້າຮ່ວມກັນຢ່າງພ້ອມພຽງ.
3 ໜ່ວຍພັກ ພາຍໃນ ອົງຄະນະພັກ ກະຊວງວິທະຍາ ສາດ ແລະ ເຕັກໂນໂລຊີ (ກວຕ) ຊຶ່ງປະກອບມີ: ໜ່ວຍພັກສະຖາບັນ ການຄຸ້ມຄອງວິທະຍາສາດ ແລະ ເຕັກໂນໂລຊີ (ສຄວຕ), ໜ່ວຍພັກສະຖາບັນພະລັງງານທົດແທນ ແລະ ວັດສະດຸໃໝ່ (ສພວ) ແລະ ໜ່ວຍພັກກົມເຕັກໂນໂລຊີ ແລະ ນະວັດຕະກຳ ໄດ້ຈັດພິທີຮັບມະຫາຊົນກ້າວໜ້າ ເຂົ້າເປັນສະມາຊິກພັກສຳຮອງ ແລະ ເລື່ອນສະມາຊິກພັກສຳຮອງ ຂຶ້ນເປັນສະມາຊິກພັກສົມບູນ ຂອງພັກປະ ຊາຊົນປະຕິວັດລາວໃນວັນທີ 12 ສິງຫາ 2020, ທີ່ຫ້ອງປະຊຸມໃຫຍ່ຂອງສະຖາບັນການຄຸ້ມຄອງວິທະຍາສາດ ແລະ ເຕັກໂນໂລຊີ ໂດຍໃຫ້ກຽດເປັນປະທານຂອງ ສະຫາຍ ບັນດິດ ສຈ. ບໍ່ວຽງຄຳ ວົງດາລາ, ກໍາມະການ ສູນກາງພັກ, ເລຂາຄະນະພັກ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ.
ໃນພິທີຄັ້ງນີ້, ສະຫາຍ ພິມພາ ອຸດທະຈັກ, ເລຂາໜ່ວຍພັກ ສະຖາບັນການຄຸ້ມຄອງວິທະຍາສາດ ແລະ ເຕັກໂນໂລຊີ ໄດ້ຂຶ້ນຜ່ານມະຕິຕົກລົງ ວ່າດ້ວຍການ ຮັບເອົາມະຫາຊົນກ້າວໜ້າ ເຂົ້າເປັນສະມາຊິກພັກສຳຮອງຂອງ ໜ່ວຍພັກ ສຄວຕ ຈໍານວນ 1 ສະຫາຍ, ຍິງ 1 ສະຫາຍ. ພ້ອມດຽວກັນນັ້ນ, ສະຫາຍ ນາງ ໄມຕີ ວົງຄໍາຊາວ, ຄະນະພັກກະຊວງ, ເລຂາໜ່ວຍພັກ ສະຖາບັນພະລັງງານທົດແທນ ແລະ ວັດສະດຸໃໝ່ ໄດ້ຂຶ້ນຜ່ານມະຕິຕົກລົງ ວ່າດ້ວຍການຮັບເອົາມະຫາຊົນກ້າວໜ້າເຂົ້າເປັນສະມາຊິກ ພັກສຳຮອງຂອງໜ່ວຍພັກ ສພວ ຈໍານວນ 1 ສະຫາຍ.
ໃນໂອກາດດຽວກັນນີ້ ຍັງໄດ້ຈັດພິທີ ເລື່ອນສະມາຊິກພັກສໍາຮອງຂຶ້ນ ເປັນສະມາຊິກພັກສົມບູນຂອງ ໜ່ວຍພັກກົມເຕັກໂນໂລຊີ ແລະ ນະວັດຕະກຳ ຈຳນວນ 4 ສະຫາຍ, ຍິງ 2 ສະຫາຍ. ຊຶ່ງຂຶ້ນຜ່ານມະຕິໂດຍ ສະຫາຍ ສຸມານະ ຈຸລາມະນີ, ຄະນະພັກກະຊວງ, ເລຂາໜ່ວຍພັກກົມເຕັກໂນໂລຊີ ແລະ ນະວັດຕະກຳ.
ໃນພິທີດັ່ງກ່າວຍັງໄດ້ເປັນກຽດຮັບຟັງການໂອ້ລົມຂອງ ສະຫາຍ ບັນດິດ ສຈ. ບໍ່ວຽງຄຳ ວົງດາລາ ຊຶ່ງສະຫາຍ ໄດ້ສະແດງຄວາມຍ້ອງຍໍຊົມເຊີຍຕໍ່ບັນດາ ໜ່ວຍພັກດັ່ງກ່າວ ທີ່ໄດ້ກໍ່ສ້າງໜ່ວຍພັກຂອງຕົນໃຫ້ມີຄວາມເຂັ້ມແຂງຂຶ້ນ ແລະ ສະແດງຄວາມຍ້ອງຍໍຊົມເຊີຍ ບັນດາມະຫາຊົນກ້າວໜ້າທີ່ໄດ້ບຸກບືນກໍ່ສ້າງຕົນເອງຈົນ ກ້າວເຂົ້າເປັນສະມາຊິກ ພັກສຳຮອງ ແລະ ສະມາຊິກພັກສຳຮອງຂຶ້ນເປັນສະມາຊິກສົມບູນ.
ສະຫາຍ ກ່າວວ່າ: ບັນດາສະມາຊິກພັກສຳຮອງ ທີ່ໄດ້ເລື່ອນເປັນສະມາຊິກພັກສົມບູນໃນຄັ້ງນີ້ແມ່ນເປັນເຫດການໜຶ່ງທີ່ສໍາຄັນສຳລັບອົງຄະນະພັກກະຊວງ ຂອງພວກເຮົາ ແລະ ເປັນເຫດການທີ່ສໍາຄັນສຳລັບບັນດາສະມາຊິກພັກເອງ, ການເຂົ້າເປັນສະມາຊິກພັກຂອງພັກປະຊາຊົນປະຕິວັດລາວ ແມ່ນມີກຽດອັນສູງສົ່ງທີ່ບັນດາ ສະມາຊິກພັກທຸກສະຫາຍ ຈະໄດ້ມີໂອກາດເຂົ້າມາຮັບໃຊ້ພັກ, ຮັບໃຊ້ຊາດ ແລະ ຮັບໃຊ້ປະຊາຊົນ ຢ່າງເຕັມປ່ຽມ ແລະ ເດີນຕາມອຸດົມການຂອງພັກ, ການເຂົ້າເປັນສະ ມາຊິກພັກ ຕ້ອງຖືເອົາສິດຜົນປະໂຫຍດສ່ວນລວມຫຼາຍກວ່າສິດຜົນປະໂຫຍດສ່ວນຕົວ ຍາມໃດຕ້ອງກຽມພ້ອມຕາມມະຕິສຳສັ່ງຂອງພັກ, ຍອມເສຍສະຫຼະທຸກສິ່ງທຸກ ຢ່າງທັງຊີວິດ ແລະ ເລືອດເນື້ອ ເພື່ອອຸດົມການປະຕິວັດ, ອຸດົມການອັນສູງສົ່ງຂອງສະມາຊິກພັກ, ສະມາຊິກພັກຕ້ອງເປັນແບບຢ່າງທີ່ດີໃຫ້ແກ່ມະຫາຊົນກ້າວໜ້າເພື່ອຮໍ່າ ຮຽນເອົາເປັນແບບຢ່າງໃນການກໍ່ສ້າງເຂົາເຈົ້າໃຫ້ກາຍເປັນສະມາຊິກພັກສຳຮອງທີ່ມີຄຸນນະພາບໃນຕໍ່ໜ້າ ແລະ ເພື່ອເຮັດໃຫ້ພັກເຮົານັບມື້ນັບມີຄວາມເຂັ້ມແຂງຖ້າພັກປະ ຊາຊົນປະຕິວັດລາວນັບມື້ມີຄວາມເຂັ້ມແຂງ, ໝາຍຄວາມວ່າ: ລະບອບປະຊາທິປະໄຕແມ່ນນັບມື້ມີຄວາມເຂັ້ມແຂງ.
ພ້ອມດຽວກັນນັ້ນ, ສະຫາຍ ຍັງໄດ້ຮຽກຮ້ອງມາຍັງຄະນະພັກ ກໍຄື ບັນດາເລຂາໜ່ວຍພັກຫ້ອງການ, ກົມ, ສະຖາບັນ ແລະ ສະມາຊິກພັກທຸກສະຫາຍຈົ່ງສືບ ຕໍ່ເສີມຂະຫຍາຍຄວາມສາມາມັກຄີເປັນຈິດໜຶ່ງໃຈດຽວ ທີ່ອົງຄະນະພັກກະຊວງຂອງພວກເຮົາມີມູນເຊື້ອມາແລ້ວ ຊຶ່ງຍາມໃດພວກເຮົາຕ້ອງຢູ່ພາຍໃຕ້ການຊີ້ນຳ-ນຳພາ ຂອງກົມການເມືອງສູນກາງພັກ ຂອງເລຂາທິການໃຫຍ່ ທີ່ເປັນແກນນຳເປັນຄັນທຸງຂອງພັກເຮົາ, ປະຕິບັດຕາມທິດຊີ້ນໍາຂອງຄະນະເລຂາທິການສູນກາງພັກ ແລະ ຄະນະ ຈັດຕັ້ງສູນກາງພັກ ເພື່ອພ້ອມກັນກຽມພ້ອມກອງປະຊຸມໃຫຍ່ຂອງຜູ້ແທນສະມາຊິກພັກ ຄັ້ງທີ 2 ຂອງອົງຄະນະພັກ ກະຊວງວິທະຍາສາດ ແລະ ເຕັກໂນໂລຊີ ໃຫ້ປະສົບ ຜົມສຳເລັດ.
ເຂົ້າຮ່ວມໃນພິທີຄັ້ງນີ້, ມີບັນດາສະຫາຍຄະນະພັກກະຊວງ, ເລຂາໜ່ວຍພັກຫ້ອງການ, ກົມ, ສະຖາບັນ ແລະ ຕາງໜ້າສາມອົງການຈັດຕັ້ງມະຫາຊົນ ພ້ອມ ດ້ວຍສະມາຊິກຂອງ 3 ໜ່ວຍພັກດັ່ງກ່າວ ຈຳນວນ 50 ກວ່າສະຫາຍ.
ຕອນບ່າຍຂອງວັນທີ 30 ມັງກອນ 2020 ຜ່ານມາ ຢູ່ຫ້ອງປະຊຸມຊັ້ນ 4, ກະຊວງວິທະຍາສາດ ແລະ ເຕັກໂນໂລຊີ (ກວຕ), ກົມແຜນການ ແລະ ຮ່ວມມື, ສະຖາບັນພະລັງງານ ແລະ ວັດສະດຸໃໝ່, ກວຕ, ບໍລິສັດ AMZ Group ຈຳກັດ ແລະ ບໍລິສັດ Marubeni ຈຳກັດ ໄດ້ເຊັນບົດບັນທືກຄວາມເຂົ້າໃຈວ່າດ້ວຍການສຶກສາ ຄວາມເປັນໄປໄດ້ໃນການຄົ້ນຄວ້າ ແລະ ພັດທະນາເຕັກໂນໂລຊີພະລັງງານແສງຕາເວັນໃນ ສປປ ລາວ.
ໂອກາດນີ້, ທ່ານ ປອ. ຄຳເພັດ ວົງດາລາ ຫົວໜ້າກົມແຜນການ ແລະ ຮ່ວມມື ກ່າວວ່າ: ການພັດ ທະນາເສດຖະກິດ-ສັງຄົມ ຂອງ ສປປ ລາວ ໃນຍຸກສະໄໝປະຕິວັດອຸດສາຫະກໍາຄັ້ງທີ 4.0 ນີ້ ຈໍາເປັນຕ້ອງ ໄດ້ນໍາໃຊ້ ແລະ ພັດທະນາເຕັກໂນໂລຊີ ເພື່ອຍົກສູງຄວາມຮູ້ຄວາມສາມາດ ໃນການຄົ້ນຄວ້າ ແລະ ພັດທະນາ, ໂດຍສະເພາະ ແມ່ນການພັດທະນາຊັບພະຍາກອນມະນຸດໃນຂົງເຂດ ວິທະຍາສາດ ແລະ ເຕັກໂນໂລຊີ ໃຫ້ນັບມື້ ນັບສູງຂື້ນ, ສະນັ້ນ ການເຊັນບົດບັນທຶກ ຄວາມເຂົ້າໃຈໃນຄັ້ງນີ້ ແມ່ນ ສອດຄ່ອງກັບຈຸດສຸມຂອງແຜນພັດທະນາ ວຽກງານວິທະຍາສາດ ແລະ ເຕັກໂນໂລຊີ ໃນປັດຈຸບັນ.
ທ່ານ ກ່າວວ່າ: ອີກດ້ານໜຶ່ງແມ່ນເພື່ອສຶກສາຄວາມເປັນໄປໄດ້ການຮ່ວມມືໃນອະນາຄົດ, ໂດຍສະເພາະແມ່ນການຍົກສູງການນໍາໃຊ້ວຽກງານ ວິທະຍາສາດ ແລະ ເຕັກໂນໂລຊີ ເຂົ້າໃນການສຶກສາຄວາມເປັນໄປໄດ້ໃນການຄົ້ນຄວ້າ ແລະ ພັດທະນາພະລັງງານໄຟຟ້າແສງຕາເວັນ ຢູ່ ສປປ ລາວ. ບໍລິສັດ Marubeni ຈາກປະເທດ ຍີ່ປຸ່ນ ຊຶ່ງເປັນບໍລິສັດແຖວໜ້າຂອງ ປະເທດຍີ່ປຸ່ນ ມີປະສົບການສູງໃນວຽກງານດັ່ງກ່າວ.
ທ່ານ SHIGERUNAGASHIMA, ຮອງອຳນວຍການ, ພະແນກພັັດທະນາທຸລະກິດພະລັງງານ ໄດ້ກ່າວວ່າ: ກຸ່ມບໍລິສັດ Marubeni ຂອງພວກເຮົາ ມີຖານໂຮງງານ ແລະ ສະຖານີຜະລິດພະລັງງານໄຟຟ້າຢູ່ທົ່ວໂລກຫຼາຍກວ່າ 38000 MW ໂດຍເປັນທຸລະກິດຮ່ວມພັດທະນາ IPP ສຳຫຼັບທຸລະກິດຜະລິດພະລັງງານ ແສງຕາເວັນ.
ພວກເຮົາ ໄດ້ລົງທຶນພັດທະນາຢູ່ໃນຂົງເຂດພູມມີພາກຕາເວັນອອກກາງປະເທດອາບູດາບີ (Abu dhabi); ພວກເຮົາໄດ້ສ້າງສະຖານີຜະລິດພະລັງງານໄຟຟ້າ ແສງຕາເວັນ 1177 MW ໄດ້ສຳເລັດແລ້ວໃນເດືອນ ເມສາ ປີ 2019 ທີ່ຜ່ານມາ.
ຫຼັງຈາກນັ້ນ, ກຸ່ມບໍລິສັດຂອງພວກເຮົາກໍໄດ້ເຊັນສັນຍາຊື້-ຂາຍໄຟ PPA ເພື່ອສ້າງຕັ້ງສະຖານີຜະລິດພະລັງງານແສງຕາເວັນຢູ່ປະເທດກາຕ້າ (Qatar) 800 MW; ພວກເຮົາ ໄດ້ຮັບຜົນສຳເລັດໃນການລົງທຶນພັດທະນາສະຖານີຜະລິດພະລັງງານໄຟຟ້າແສງຕາເວັນແບບມີສ່ວນຮ່ວມກັບພາກພື້ນຕາມນະໂຍບາຍ IPP.
ກຸ່ມບໍລິສັດ ຂອງພວກເຮົາ ເປັນກຸ່ມບໍລິສັດທີ່ຜະລິດພະລັງງານແສງຕາເວັນອັນດັບໜຶ່ງຂອງໂລກ. ການລົງທຶນຢູ່ອາຊີ, ພວກເຮົາໄດ້ຊອກຫາພື້ນທີ່ດິນ ໃນການ ພັດທະນາສະຖານີຜະລິດໄຟຟ້າແສງຕາເວັນທີ່ໃຫຍ່ກວ່າ 100 MW ຂຶ້ນໄປໄດ້ຍາກຫຼາຍ ເພື່ອຜະລິດໄຟຟ້າທີ່ຖືກພ້ອມທັງເປັນພະລັງງານທົດແທນທີ່ຂາວສະອາດ ແລະ ດີຕໍ່ສິ່ງແວດລ້ອມ.
ປະເທດລາວ ເປັນປະເທດທີ່ໄດ້ຮັບແສງຕາເວັນຫຼາຍ ຊຶ່ງພວກເຮົາມີຄວາມຕ້ອງການໃນການຮ່ວມມືກັບກະຊວງວິທະຍາສາດ ແລະ ເຕັກໂນໂລຊີ ເພື່ອນຳໃຊ້ ທີ່ດິນຂອງປະເທດລາວໃຫ້ເກີດປະໂຫຍດ. ກຸ່ມບໍລິສັດ Marubeni ມີຄວາມຫວັງວ່າຈະນຳໃຊ້ປະສົບການ ແລະ ເຕັກໂນໂລຊີຂອງກຸ່ມບໍລິສັດຂອງພວກເຮົາມາປະກອບ ສ່ວນເຂົ້າໃນ ການສ້າງສະຖານີຜະລິດໄຟຟ້າແສງຕາເວັນທີ່ໃຫຍ່ທີ່ສຸດໃນອາຊີໃຫ້ປະສົບຄວາມສຳເລັດຢ່າງທີ່ຫວັງໄວ້ໄດ້.
ໃນການສຶກສາຄວາມເປັນໄປໄດ້ (Pre-FS) ໃນຄັ້ງນີ້ ໄດ້ມີການພັດທະນາສະຖານີຜະລິດໄຟຟ້າແສງຕາເວັນນັບມື້ນັບມີຄວາມກ້າວໜ້າຫຼາຍຂຶ້ນ. ການນຳໃຊ້ ວິທະຍາສາດ ແລະ ເຕັກໂນໂລຊີໃໝ່ໆເຂົ້າໃນການສ້າງໃຫ້ເປັນເສດຖະກິດຕ້ອງໄດ້ມີການຕັດສິນໃຈຢ່າງວ່ອງໄວ.
ພວກເຮົາ ຄິດວ່າຄວາມສຳເລັດຂອງໂຄງການນີ້ ຕ້ອງໄດ້ມີການຮ່ວມມື້ຈາກປະເທດອ້ອມຂ້າງໃນການຊົມໃຊ້ພະລັງງານແສງຕາເວັນ, ດັ່ງນັ້ນ ພວກເຮົາຫວັງຢ່າງ ຍິ່ງວ່າຈະໄດ້ຮັບການສະໜັບສະໜູນ ແລະ ຄວາມຮ່ວມມືຈາກທາງພາກລັດ. ປີ 2020 ນີ້ ເປັນປີທີ່ສະເຫຼີມສະຫຼອງສາຍພົວພັນທາງການທູດລະຫວ່າງ ລາວ-ຍີປຸ່ນ ຄົບ ຮອບ 65 ປີ ຊຶ່ງພວກເຮົາຫວັງວ່າໂຄງການ Pre-FS ຂອງໂຄງການນີ້ ຈະເປັນນິມິດໝາຍທີ່ດີ ແລະ ຂອງຂວັນອັນລ້ຳຄ່າໃຫ້ແກ່ສາຍພົວພັນ ລາວ-ຍີ່ປຸ່ນ ໃຫ້ນັບມື້ນັບ ແໜ້ນແຟ້ນຍິ່ງຂຶ້ນ.
ພະແນກວິທະຍາສາດ ແລະ ເຕັກໂນໂລຊີ ແຂວງບໍ່ແກ້ວ ມາຢ້ຽມຢາມ (ແບບບໍ່ເປັນທາງການ), ສຶກສາ ແລະ ຮ່ວມກັນຂຽນໂຄງການລະບົບໄຟຟ້າແສງຕາເວັນເຊື່ອມຕໍ່ຕາຂ່າຍ ເພື່ອຈະໄດ້ຕິດຕັ່ງໃສ່ຫ້ອງການຂອງ ພວຕ ແຂວງ
ໃນວັນທີ 06 ສິງຫາ 2020 ຄະນະ ສພວ ນຳໂດຍ ທ່ານ ນ. ໄມຕີ ວົງຄຳຊາວ, ຫົວໜ້າ ສພວ ຕ້ອນຮັບ ທ່ານ ວຽງທອງ ວົງທະວິໄລ, ຫົວໜ້າ ກມວ ພ້ອມດ້ວຍຄະນະ ລົງຢ້ຽມຢາມຫ້ອງທົດລອງ ສພວ ເພື່ອປືກສາຫາລືກັນ ແລະ ກວດເບີ່ງເຄື່ອງມືອຸປະກອນຂອງຫ້ອງທົດລອງ ສພວ ໃນການຊອກຫາຊ່ອງທາງການຮ່ວມມືກັນດ້ານການບໍລິການມາດຕະຖານ
ໃນວັນທີ23 ກໍລະກົດ 2020 ທີ່ຜ່ານມານີ້ ຢູ່ທີ່ຫ້ອງປະຊຸມ ສະຖາບັນພະລັງງານທົດແທນ ແລະ ວັດສະດຸໃໝ່, ທ່ານ ບຸນຈັນ ດວງວິໄລ, ຮອງຫົວໜ້າສະຖາບັນພະລັງງານທົດແທນ ແລະ ວັດສະດຸໃໝ່, ພ້ອມດ້ວຍຄະນະສະຖາບັນ ແລະ ຄະນະພະແນກ ໄດ້ຕ້ອນຮັບ ຄະນະທິມງານ ສະຖາບັນຄົ້ນຄ້ວາພະລັງງານ ແລະ ບໍ່ແຮ່, ກະຊວງພະລັງງານ ແລະ ບໍ່ແຮ່ ນຳພາຄະນະລົງຢ້ຽມຢາມໂດຍ ທ່ານ ປອ ອະນຸສັກ ພົງສະຫວັດ, ຮອງຫົວໜ້າສະຖາບັນຄົ້ນຄ້ວາພະລັງງານ ແລະ ບໍ່ແຮ່, ພ້ອມດ້ວຍຄະນະ, ທີ່ໄດ້ລົງຢ້ຽມຢາມຫ້ອງທົດລອງ ແລະ ປຶກສາຫາລືແລກປ່ຽນຖອດຖອນບົດຮຽນເຊິ່ງກັນ ແລະ ກັນ, ໃນການນຳໃຊ້ອຸປະກອນເຄື່ອງມືຫ້ອງທົດລອງ ແລະ ບຸກຄະລາກອນ ທີ່ມີຢູ່ຮ່ວມກັນ ສຶກສາຄົ້ນຄ້ວາທົດລອງ ເພື່ອເສີມຂະຫຍາຍເຂົ້າໃນຂົງເຂດວຽກງານສອງຝ່າຍ, ພ້ອມທັງປຶກສາວຽກງານການຄົ້ນຄວ້າ ແລະ ອື່ນໆ.
ໂດຍຈັດຕັ້ງປະຕິບັດຕາມຄໍາແນະນໍາ ຂອງຄະນະຈັດຕັ້ງສູນກາງພັກກ່ຽວກັບການຈັດຕັ້ງປະຕິບັດຄໍາສັ່ງຂອງກົມການເມືອງສູນກາງພັກ ວ່າດ້ວຍການເພີ່ມທະວີ ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ສະບັບເລກທີ 291/ຄຈສພ, ສະບັບລົງວັນທີ 26 ເມສາ 2018, ອີງຕາມການຄົ້ນຄວ້າຂອງກອງປະຊຸມຄະນະກວດກາ ແລະ ປະເມີນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຄັ້ງວັນທີ 9 ມິຖຸນາ 2020 ແລະ ມະຕິຕົກລົງວ່າດ້ວຍການຮັບຮອງເປັນຫນ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2019 ສະບັບເລກທີ 125/ຄພ.ກວຕ. ໃນວັນທີ 21 ກໍລະກົດ 2020 ນີ້, ອົງຄະນະພັກ ກະຊວງວິທະຍາສາດ ແລະ ເຕັກໂນໂລຊີ (ກວຕ) ໄດ້ຈັດພິທີມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ບັນດາໜ່ວຍພັກຫ້ອງການ, ກົມ, ສະຖາບັນ ພາຍໃນອົງຄະນະພັກ ຢູ່ທີ່ຫ້ອງປະຊຸມໃຫຍ່ຂອງ ສະຖາບັນການຄຸ້ມຄອງວິທະຍາສາດ ແລະ ເຕັກໂນໂລຊີ (ຫຼັກ 14, ບ້ານດອນຕິ້ວ) ໂດຍໃຫ້ກຽດເປັນປະທານຂອງ ສະຫາຍ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ມີບັນດາຄະນະພັກກະຊວງ, ເລຂາໜ່ວຍພັກຫ້ອງການ, ກົມ, ສະຖາບັນ ພ້ອມດ້ວຍສະມາຊິກພັກພາຍໃນ ກວຕ ເຂົ້າຮ່ວມຢ່າງພ້ອມພຽງ.
ໃນພິທີດັ່ງກ່າວ, ສະຫາຍ ບຸນປອນ ບົວແພງ, ເລຂາໜ່ວຍພັກກົມຈັດຕັ້ງ ແລະ ພະນັກງານໄດ້ຂຶ້ນຜ່ານບົດສະຫຼຸບສະພາບການເຄື່ອນໄຫວ ວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂອງອົງຄະນະພັກກະຊວງວິທະຍາສາດ ແລະ ເຕັກໂນໂລຊີ ປີ 2019 ຊຶ່ງພາຍຫຼັງສໍາເລັດກອງປະຊຸມບັ້ນປັບປຸງປົວແປງພັກ ປີ 2018 ຂອງຄະນະບໍລິຫານງານ ອົງຄະນະພັກ ກະຊວງວິທະຍາສາດ ແລະ ເຕັກໂນໂລຊີ. ຄະນະພັກ, ຄະນະໜ່ວຍວຍພັກ ພ້ອມດ້ວຍສະມາຊິກພັກ ໄດ້ເອົາໃຈໃສ່ສືບຕໍ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ ເວົ້າລວມ, ເວົ້າສະເພາະ ກໍຄືມະຕິກອງປະຊຸມໃຫຍ່ສະມາຊິກພັກ ຄັ້ງທີ I ຂອງອົງຄະນະພັກກະຊວງວິທະຍາສາດ ແລະ ເຕັກໂນໂລຊີ ແລະ ມະຕິກອງປະຊຸມໃຫຍ່ ຄັ້ງທີ I ຂອງ ບັນດາໜ່ວຍພັກ, ທັງເປັນທິດທາງແຜນການ ແລະ ຄາດໝາຍສູ້ຊົນ. ໃນນັ້ນ, ວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໄດ້ວາງຄາດໝາຍສູ້ຊົນຢ່າງໜ້ອຍບໍ່ໃຫ້ຫຼຸດ 80% ຂອງຈໍານວນໜ່ວຍພັກ ໃນປີ 2019.
ອົງຄະນະພັກ ກະຊວງວິທະຍາສາດ ແລະ ເຕັກໂນໂລຊີ ໄດ້ນຳພາສະມາຊິກພັກ, ຄະນະໜ່ວຍພັກທຸກສະຫາຍ ໄດ້ສຸມສະຕິປັນຍາ, ຄວາມຮູ້ຄວາມສາມາດ, ເຫື່ອແຮງ ແລະ ປຸ້ມລຸມຄວາມສາມັກຄີເປັນກ້ອນກໍາລັງແຮງຈັດຕັ້ງປະຕິບັດແຜນການທີ່ໄດ້ຮັບຮອງຢ່າງເປັນທາງການເຂົ້າສູ່ຕົວຈິງ, ສອດຄ່ອງ ກັບເງື່ອນໄຂ ຂອງຕົນຢ່າງຕັ້ງໜ້າ ໂດຍຜ່ານຂະບວນການເຄື່ອນໄຫວຕ່າງໆ ຊຶ່ງເປັນເງື່ອນໄຂສໍາຄັນໃນການກວດກາ ແລະ ປັບປຸງກໍ່ສ້າງເຊິ່ງກັນ ແລະ ກັນໃນດ້ານຄຸນທາດການເມືອງ, ດ້ານການຈັດຕັ້ງ, ການປະຕິບັດແນວທາງຂອງພັກກົດໝາຍຂອງລັດ ເພື່ອເລືອກເຟັ້ນຊອກຫາບຸກຄົນທີ່ດີເດັ່ນໃນຂະບວນການເພື່ອເປັນເປົ້າໝາຍກໍ່ສ້າງເປັນສະມາຊິກພັກທີ່ປອດໃສ, ເຂັ້ມແຂງ, ໜັກແໜ້ນ.
ບັນດາໜ່ວຍພັກ ໄດ້ເປັນເຈົ້າການໃນການຈັດຕັ້ງປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂອງໜ່ວຍພັກຕົນ ໂດຍໄດ້ມີການແບ່ງງານ, ແບ່ງຄວາມຮັບຜິດຊອບ ພາຍໃນໜ່ວວຍພັກ ຢ່າງລະອຽດ ເພື່ອນໍາພາຈັດຕັ້ງກວດກາ, ສະຫຼຸບຕີລາຄາການຈັດຕັ້ງປະຕິບັດແຜນການ ແລະ ຕີລາຄາຄວາມຮັບຜິດຊອບຂອງສະມາຊິກພັກແຕ່ລະສະຫາຍ, ຕີລາຄາປະເມີນຜົນຢ່າງລະອຽດພາວະວິໄສ, ສ່ອງແສງເຖິງສະພາບຄວາມເປັນຈິງຂອງການເຄື່ອນໄຫວ ຊີ້ນໍາ-ນໍາພາ ຂອງຄະນະໜ່ວຍພັກ ເພື່ອຕີລາຄາປະເພດໜ່ວຍພັກ ແລະ ຈັດປະເພດຕໍ່ບັນດາສະຫາຍສະມາຊິກພັກ ຊຶ່ງແຕ່ລະໜ່ວຍພັກຕ້ອງມີສະມາຊິກພັກແຂງກວມ 80% ຂຶ້ນໄປ ແລະ ມີຄະແນນບັນລຸ 9-10 ຄະແນນ.
ມາຮອດປັດຈຸບັນ, ຄະນະພັກ ກະຊວງວິທະຍາສາດ ແລະ ເຕັກໂນໂລຊີ ໄດ້ອອກມະຕິຕົກລົງ ສະບັບເລກທີ 125/ຄພ.ກວຕ, ລົງວັນທີ 1 ມິຖຸນາ 2020 ວ່າດ້ວຍການຮັບຮອງ ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປີ 2019 ຈໍານວນ 13 ໜ່ວຍພັກ ປະກອບມີ: ໜ່ວຍພັກຫ້ອງການ, ໜ່ວຍພັກກົມຈັດຕັ້ງ ແລະ ພະນັກງານ, ໜ່ວຍພັກກົມແຜນການ ແລະ ຮ່ວມມື, ໜ່ວຍພັກກົມກວດກາ, ໜ່ວຍພັກກົມຊັບສິນທາງປັນຍາ, ໜ່ວຍພັກກົມວິທະຍາສາດ, ໜ່ວຍພັກກົມມາດຕະຖານ ແລະ ວັດແທກ, ໜ່ວຍພັກກົມເຕັກໂນໂລຊີດິຈິຕ໋ອນ, ໜ່ວຍພັກກົມເຕັກໂນໂລຊີ ແລະ ນະວັດຕະກໍາ, ໜ່ວຍພັກສະຖາບັນພະລັງງານທົດແທນ ແລະ ວັດສະດຸໃໝ່, ໜ່ວຍພັກສະຖາບັນນິເວດວິທະຍາ ແລະ ເຕັກໂນໂລຊີຊີວະພາບ, ໜ່ວຍພັກສະຖາບັນເຕັກໂນໂລຊີຄອມພິວເຕີ ແລະ ເອເລັກໂຕຣນິກ ແລະ ໜ່ວຍພັກຫ້ອງການສະພາວິທະຍາສາດ ແຫ່ງຊາດ. ການມອບໃບຢັ້ງຢືນດັ່ງກ່າວແມ່ນເປັນປີທໍາອິດຂອງບັນດາໜ່ວຍພັກ ກໍຄືອົງຄະນະພັກ ກະຊວງວິທະຍາສາດ ແລະ ເຕັກໂນໂລຊີ ທີ່ໄດ້ຮັບຮອງເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຈາກທັງຫມົດ 14 ໜ່ວຍພັກ. ສ່ວນໜຶ່ງໜ່ວຍພັກຄື ໜ່ວຍພັກສະຖາບັນການຄຸ້ມຄອງວິທະຍາສາດ ແລະ ເຕັກໂນໂລຊີ ແມ່ນໜ່ວຍພັກທີ່ສ້າງຂຶ້ນໃໝ່ ປັດຈຸບັນແມ່ນໄດ້ສໍາເລັດຮັບຮອງເອົາແຜນກໍ່ສ້າງເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ຈະໄດ້ຮັບການປະເມີນໃນປີ 2020.
ໃນພິທີອັນສະຫງ່າລາສີດັ່ງກ່າວ ກໍໄດ້ມີພິທີມອບ-ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜັນ ໃຫ້ແກ່ບັນດາໜ່ວຍພັກຫ້ອງການ, ກົມ, ສະຖາບັນ ຈຳນວນ 13 ໜ່ວຍພັກ ແລະ ໂອກາດດຽວກັນນີ້, ຍັງໄດ້ຈັດພິທີມອບບັດສະມາຊິກ ໃຫ້ແກ່ສະມາຊິກພັກສົມບູນທີ່ຜ່ານມາດຖານເງື່ອນໄຂ ຊຸດທີ VIII ຈໍານວນ 55 ສະຫາຍ, ຍິງ 20 ສະຫາຍ ຊຶ່ງໃຫ້ກຽດຂຶ້ນມອບໂດຍ ສະຫາຍ ບັນດິດ ສຈ. ບໍ່ວຽງຄຳ ວົງດາລາ, ກໍາມະການສູນກາງພັກ, ເລຂາຄະນະພັກ ກະຊວງວິທະຍາສາດ ແລະ ເຕັກໂນໂລຊີ. ພາຍຫຼັງສໍາເລັດພິທີດັ່ງກ່າວ, ບັນດາສະມາຊິກພັກທີ່ເຂົ້າຮ່ວມກອງປະຊຸມຍັງໄດ້ເປັນກຽດຮັບຟັງການໂອ້ລົມຂອງສະຫາຍປະທານ ຊຶ່ງເຕັມໄປດ້ວຍເນື້ອໃນທີ່ມີຄວາມໝາຍຄວາມສໍາຄັນ ແລະ ເປັນເຂັມຊີ້ທິດເຍື່ອງທາງໃນການຜັນຂະຫຍາຍເຂົ້າສູ່ການຈັດຕັ້ງປະຕິບັດວຽກງານໃນແຕ່ລະຂົງເຂດວຽກງານຂອງບັນດາສະມາຊິກພັກໃຫ້ມີຄວາມເຂັ້ມແຂງຂຶ້ນເລື້ອຍໆ.
Newer Posts