ໜ້າທີ່
ສະຖາບັນຄົ້ນຄວ້າພະລັງງານ ແລະ ບໍ່ແຮ່ ມີໜ້າທີ່ດັ່ງລຸ່ມນີ້:
ຜັນຂະຫຍາຍແນວທາງ, ນະໂຍບາຍຂອງພັກ ແລະ ລັດຖະບານ, ແຜນການ, ແຜນງານ, ໂຄງ ການລະອຽດ ຂອງສະຖາບັນ;
ສົມທົບກັບບັນດາກົມ, ລັດວິສາຫະກິດ ທີ່ຂຶ້ນກັບກະຊວງ ເພື່ອຄົ້ນຄວ້າ ແລະ ສ້າງວິໄສທັດ, ນະໂຍບາຍ, ແຜນຍຸດທະສາດ, ແຜນພັດທະນາຊັບພະຍາກອນແຮ່ທາດ, ລະບຽບການ, ສັນຍາສໍາປະທານພັດທະນາບໍ່ແຮ່, ລະບຽບການປະມູນເອົາສິດສໍາປະທານບໍ່ແຮ່, ມາດຖານທາງດ້ານເຕັກນິກ ແລະ ບົດແນະນໍາ, ຄູ່ມື ກ່ຽວກັບວຽກງານທໍລະນີສາດ ແລະ ບໍ່ແຮ່ ເພື່ອນໍາສະເໜີຂັ້ນເທິງພິຈາລະນາ;
ຄົ້ນຄວ້າເຕັກໂນໂລຊີນະວັດຕະກໍາໃໝ່ ແລະ ວິທີການນໍາໃຊ້ ກ່ຽວກັບ ໄຟຟ້ານໍ້າຕົກ, ພະລັງງານອື່ນໆ (ພະລັງງານໝູນວຽນ, ພະລັງງານຊີວະພາບ, ພະລັງງານຊີວະມວນ, ພະລັງງານຟອດຊີວ ແລະ ພະລັງງານອື່ນໆ) ແລະ ປະຢັດພະລັງງານ;
ຄົ້ນຄວ້າ, ທົດລອງ ແລະ ຮູບແບບຈໍາລອງອົງປະກອບວິສະວະກໍາແຜນທີ່, ອຸຕຸນິຍົມ-ອຸທົກກະສາດໂຍທາທິການຂອງເຂື່ອນ-ໂຮງໄຟຟ້າ, ການປະເມີນໂຄງການໄຟຟ້ານໍ້າຕົກ, ກົນຈັກລະບົບຄວບຄູມຄວາມໜັ້ນຄົງຂອງເຂື່ອນ-ໂຮງງານໄຟຟ້າ, ພະລັງງານທົດແທນ, ພະລັງງານເລືອກໃໝ່, ພະລັງງານຟອດຊີວ, ການອະນຸລັກ ແລະ ປະຢັດພະລັງງານ ແລະ ອື່ນໆ.
ສຶກສາ, ຄົ້ນຄວ້າດ້ານວິທະຍາສາດ ທີ່ຕິດພັນກັບວຽກງານທໍລະນີສາດ ແລະ ແຮ່ທາດເຊັ່ນ: ພູໄຟ, ແຜ່ນດິນໄຫວຕ່າງໆ ແລະ ແຫຼ່ງນໍ້າໃຕ້ດິນ;
ສຶກສາຄົ້ນຄວ້າວິທະຍາສາດ, ເຕັກນິກ, ເຕັກໂນໂລຊີ ກ່ຽວກັບການອອກແບບການຊອກຄົ້ນ, ສໍາຫຼວດ, ການຂຸດຄົ້ນ ແລະ ການປຸງແຕ່ງແຮ່ທາດ, ອ່າງຫາງແຮ່, ລວມທັງການຟື້ນຟູ, ການປິດບໍ່ແຮ່ ແລະ ການສົ່ງມອບເນື້ອທີ່ສໍາປະທານຄືນ ຮ່ວມກັບພາຍໃນ ແລະ ຕ່າງປະເທດ;
ຄຸ້ມຄອງສູນຝຶກອົມຮົມ, ສູນວິໄຈ, ຫ້ອງທົດລອງ ແລະ ຮູບແບບຈໍາລອງ, ເຮັດການທົດລອງທາງດ້ານທໍລະນີສາດ-ເຕັກນິກ, ທໍລະນີກໍ່ສ້າງ, ວິໄຈ ແລະ ຢັ້ງຢືນແຮ່ທາດ ແລະ ຜະລິດຕະພັນແຮ່ທາດ ວິໄຈຄຸນນະພາບສິ່ງແວດລ້ອມບໍ່ແຮ່, ດິນ, ຫີນ, ນໍ້າ, ມົນລະພິດທາງອາກາດ ແລະ ສິ່ງເສດເຫຼືອຈາກການຂຸດຄົ້ນ ແລະ ການປຸ່ງແຕ່ງແຮ່ທາດ ແລະ ດ້ານພະລັງງງານ;
ຄົ້ນຄວ້າ ຂໍ້ມູນປະລິມານສະສົມແຮ່ທາດ, ເພື່ອສະເໜີໃຫ້ຄະນະກໍາມະການຕີລາຄາ ແລະ ຮັບຮອງປະລິມານສະສົມແຮ່ທາດ ຮັບຮອງເອົາ;
ເຂົ້າຮ່ວມເປັນກອງເລຂາຊ່ວຍວຽກ ຄະນະກຳມະການຕີລາຄາ ແລະ ຮັບຮອງປະລິມານສະສົມແຮ່ທາດ, ຄະນະກໍາມະການປະມູນເອົາສິດສໍາປະທານບໍ່ແຮ່, ຄະນະກໍາມະການກວດຜ່ານ ແລະ ຮັບຮອງບົດລາຍງານຜົນການສຶກສາຄວາມເປັນໄປໄດ້ທາງດ້ານເສດຖະກິດ-ເຕັກນິກຕາມການແຕ່ງຕັ້ງຂອງລັດຖະມົນຕີກະຊວງພະລັງງານ ແລະ ບໍ່ແຮ່;
ຄົ້ນຄວ້າ ຫຼັກສູດ, ສ້າງຄູ່ມື, ມາດຕະຖານ, ແລະ ບົດຄໍາແນະນໍາ ການນຳໃຊ້ເຕັກນິກເຕັກໂນໂລຊີທາງດ້ານທໍລະນີສາດ ແລະ ບໍ່ແຮ່ ເຊັ່ນ: ການຊອກຄົ້ນ, ການສຳຫຼວດ, ການຂຸດຄົ້ນ, ການປຸງແຕ່ງ ອ່າງຫາງແຮ່, ການຟື້ນຟູສິ່ງແວດລ້ອມ, ການປິດບໍ່ແຮ່ ແລະ ການສົ່ງມອບເນື້ອທີ່ສໍາປະທານຄືນ;
ຄົ້ນຄວ້າ, ປະເມີນ, ຢັ້ງຢືນ ບົດສຶກສາຄວາມເປັນໄປໄດ້ທາງດ້ານເສດຖະກິດ-ເຕັກນິກ ຂອງໂຄງການລົງທຶນດ້ານບໍ່ແຮ່ ແລະ ສະເໜີຕໍ່ຄະນະກໍາມະການ ສຶກສາກວດຜ່ານ ແລະ ຮັບຮອງບົດສຶກສາຄວາມເປັນໄປໄດ້ ທາງດ້ານເສດຖະກິດ-ເຕັກນິກ ເພື່ອຮັບຮອງ;
ກວດກາ ແລະ ຢັ້ງຢືນການອະນຸຍາດສົ່ງອອກຕົວຢ່າງອຸດສາຫະກໍາໄປທົດລອງເຕັກໂນໂລຊີ ໃນໄລຍະສ້າງບົດສຶກສາຄວາມເປັນໄປໄດ້ທາງດ້ານເສດຖະກິດ-ເຕັກນິກ ແລະ ໄລຍະພັດທະນາບໍ່ແຮ່ ເພື່ອຄັດເລືອກອຸປະກອນກົນຈັກ ແລະ ເຕັກໂນໂລຊີໃນການປຸງແຕ່ງ;
ເກັບກໍາສະຖິຕິ, ສະຫຼຸບ ການນໍາເຂົ້າ ແລະ ສົ່ງອອກຕົວຢ່າງອຸດສາຫະກໍາໄປທົດລອງເຕັກໂນໂລຊີຕາມພາລະບົດບາດ;
ປຸງແຕ່ງ, ວິໄຈ, ກວດສອບຕົວຢ່າງແຮ່ທາດ ແລະ ຜະລິດຕະພັນແຮ່ທາດ ໃຫ້ແກ່ໂຄງການລົງທຶນ ຂອງລັດ, ບັນດາບໍລິສັດລົງທຶນດ້ານແຮ່ທາດ, ໂຄງການຮ່ວມມືກັບເອກະຊົນພາຍໃນ, ຕ່າງປະເທດ;
ທົດສອບ ແລະ ຢັ້ງຢືນມາດຕະຖານ-ເຕັກນິກຂອງອຸປະກອນກົນຈັກ ທີ່ນໍາໃຊ້ໃນໂຄງການລົງທຶນ ຂອງລັດ, ບັນດາບໍລິສັດລົງທຶນດ້ານພະລັງງານ ແລະ ບໍ່ແຮ່, ໂຄງການຮ່ວມມືກັບເອກະຊົນພາຍໃນ ແລະ ຕ່າງປະເທດ;
ສະໜອງການບໍລິການທີ່ຕິດພັນກັບການ ຊອກຄົ້ນ, ສໍາຫຼວດແຮ່ທາດ ໂດຍສົມທົບກັບກົມທໍລະນີສາດ ແລະ ແຮ່ທາດ;
ທົບທວນ ແລະ ມີຄໍາເຫັນຕໍ່ບົດສຶກສາຄວາມເປັນໄປໄດ້ ທາງດ້ານເສດຖະກິດ-ເຕັກນິກ ທີ່ໄດ້ຖືກຮັບຮອງຈາກຄະນະກໍາມະການ ສຶກສາກວດຜ່ານ ແລະ ຮັບຮັບຮອງບົດສຶກສາຄວາມເປັນໄປໄດ້ທາງດ້ານເສດຖະກິດ-ເຕັກນິກ ເປັນແຕ່ລະໄລຍະ;
ລົງຕິດຕາມ, ກະຕຸກຊຸກຍູ້ ແລະ ໃຫ້ຄໍາແນະນໍາ ທາງດ້ານວິຊາການ ໃຫ້ແກ່ພະແນກພະລັງງານ ແລະ ບໍ່ແຮ່, ບັນດາແຂວງ, ນະຄອນຫຼວງ, ລັດວິສາຫະກິດ ແລະ ຜູ້ລົງທຶນ ດ້ານພະລັງງານ, ທໍລະນີສາດ ແລະ ບໍ່ແຮ່;
ຄົ້ນຄວ້າ ແລະ ປະກອບຄໍາເຫັນດ້ານເຕັກນິກ, ເຕັກໂນໂລຊີ ຂອງວຽກງານ ພະລັງງານ, ທໍລະນີສາດ ແລະ ບໍ່ແຮ່;
ເຂົ້າຮ່ວມກວດກາ ການຈັດຕັ້ງປະຕິບັດວຽກງານຢູ່ພາກສະໜາມ ຂອງບັນດາໂຄງການລົງທຶນດ້ານພະລັງງານ, ທໍລະນີສາດ ແລະ ບໍ່ແຮ່ ຕາມການສະເໜີ ແລະ ເຊື້ອເຊີນຂອງຂະແໜງການທີ່ກ່ຽວຂ້ອງ;
ເຂົ້າຮ່ວມຄົ້ນຄວ້າ ກັບພາກສ່ວນຂອງລັດ, ກໍານົດພັນທະທາງດ້ານການເງິນ ຂອງຂະແໜງພະລັງງານ, ທໍລະນີສາດ, ບໍ່ແຮ່ ແລະ ບົດໂຄສ້າງລາຄາໄຟຟ້າ;
ຈັດພິມ, ເຜີຍແຜ່ລະບຽບການ, ກົດໝາຍ, ແຜນຍຸດທະສາດ, ຫຼັກສູດ, ຄູ່ມື ແລະ ມາດຖານທາງດ້ານເຕັກນິກ ຂອງຂະແໜງການ ພະລັງງານ, ທໍລະນີສາດ ແລະ ບໍ່ແຮ່;
ຄົ້ນຄວ້າ, ສ້າງຫຼັກສູດ ແລະ ດໍາເນີນການຝຶກອົບຮົມທີ່ຕິດພັນກັບວຽກງານພະລັງງານ, ທໍລະນີສາດ ແລະ ບໍ່ແຮ່;
ພົວພັນກັບບັນດາປະເທດ, ອົງການຈັດຕັ້ງສາກົນຂັ້ນຕ່າງໆ ເພື່ອແລກປ່ຽນບົດຮຽນ ແລະ ຍາດແຍ່ງການຊ່ວຍເຫຼືອ ຕາມນະໂຍບາຍລວມຂອງພັກ-ລັດ ວາງອອກ;
ພົວພັນຫ້ອງວິໄຈແຮ່ທາດ ຂອງພາກລັດ, ເອກະຊົນ ທັງພາຍໃນ ແລະ ຕ່າງປະເທດ ແລະ ອົງການຈັດຕັ້ງສາກົນ ທີ່ໄດ້ຮັບອະນຸຍາດຖືກຕ້ອງຕາມກົດໝາຍ ເພື່ອຮ່ວມມື, ທັດສະນະສຶກສາ ແລະ ຖອດຖອນບົດຮຽນໃນການວິໄຈແຮ່ທາດ;
ຄຸ້ມຄອງ, ນໍາໃຊ້ງົບປະມານ, ທຶນຝຶກອົບຮົມພະນັກງານ, ກອງທຶນສົ່ງເສີມ ແລະ ພັດທະນາພະລັງງານ ແລະ ຊັບສົມບັດຕ່າງໆ ຕາມການມອບໝາຍຂອງລັດຖະມົນຕີ;
ຄົ້ນຄວ້າ ແລະ ນຳສະເໜີການປັບປຸງກົງຈັກການຈັດຕັ້ງ, ແຕ່ງຕັ້ງ, ຍົກຍ້າຍ, ປົດຕຳແໜ່ງ, ບຳລຸງ, ກໍ່ສ້າງ, ບັນຈຸ, ສັບຊ້ອນ, ປະຕິບັດວິໄນ ແລະ ນະໂຍບາຍ ໃຫ້ແກ່ພະນັກງານ-ລັດຖະກອນພາຍໃນສະຖາບັນ ຕາມນະໂຍບາຍຂອງ ພັກ-ລັດ ແລະ ລະບຽບການວາງອອກ;
ຄົ້ນຄວ້າ ແລະ ນຳສະເໜີການປະຕິບັດວິໄນ ແລະ ນະໂຍບາຍ ແກ່ການຈັດຕັ້ງ ແລະ ບຸກຄົນ ທັງພາຍໃນ ແລະ ຕ່າງປະເທດ ໃນການຈັດຕັ້ງປະຕິບັດໂຄງການ;
ປະເມີນຜົນການປະຕິບັດວຽກງານຂອງລັດຖະກອນປະຈຳປີ, ການຂຶ້ນແຜນກຳນົດພະນັກງານນຳພາ-ຄຸ້ມຄອງ ແລະ ການກຳນົດຕຳແໜ່ງງານຂອງສະຖາບັນໃຫ້ຄົບຖ້ວນ ໂດຍສົມທົບກັບກົມຈັດຕັ້ງ ແລະ ພະນັກງານ ຂອງກະຊວງ;
ປະຕິບັດໜ້າທີ່ກວດກາລັດໃນຂອບເຂດຄວາມຮັບຜິດຊອບຂອງສະຖາບັນ ແລະ ຕາມການມອບໝາຍຂອງຂັ້ນເທິງ;
ປະຕິບັດໜ້າທີ່ອື່ນໆ ຕາມການມອບໝາຍຂອງລັດຖະມົນຕີ.
ຂອບເຂດສິດ
ສະຖາບັນຄົ້ນຄວ້າພະລັງງານ ແລະ ບໍ່ແຮ່ ມີສິດດັ່ງລຸ່ມນີ້:
- ນໍາສະເໜີຂັ້ນເທິງເພື່ອ ປັບປຸງ, ລົບລ້າງ ແລະ ປະກາດໃຊ້ ບັນດາຂໍ້ກໍານົດ, ລະບຽບການ, ມາດຕະຖານສັນຍາສາປະທານ ແລະ ມາດຕະຖານເຕັກນິກທາງດ້ານພະລັງງານ, ທໍລະນີສາດ ແລະ ບໍ່ແຮ່;
- ນໍາສະເໜີວິທີການນໍາໃຊ້ຜົນສໍາເລັດທາງດ້ານ ວິທະຍາສາດ, ເຕັກນິກ, ເຕັກໂນໂລຊີ ທີ່ຕິດພັນກັບວຽກງານພະລັງງານ, ທໍລະນີສາດ ແລະ ບໍ່ແຮ່;
- ເຂົ້າຮ່ວມໃນການຄົ້ນຄວ້າຂໍ້ມູນປະລິມານສະສົມເພື່ອສະເໜີ ໃຫ້ຄະນະກໍາມະການຕີລາຄາ ແລະ ຮັບຮອງປະລິມານສະສົມແຮ່ທາດ ຮັບຮອງເອົາ;
- ປຸງແຕ່ງ, ວິໄຈ, ກວດສອບຕົວຢ່າງແຮ່ທາດ ແລະ ຜະລິດຕະພັນແຮ່ທາດ ໃຫ້ແກ່ໂຄງການລົງທຶນ ຂອງລັດ, ບັນດາບໍລິສັດລົງທຶນດ້ານແຮ່ທາດ, ໂຄງການຮ່ວມມືກັບເອກະຊົນພາຍໃນ, ຕ່າງປະເທດ ແລະ ເກັບຮັກສາຕົວຢ່າງແຮ່ທາດ;
- ຢັ້ງຢືນ ເຕັກນິກທາງດ້ານທໍລະນີສາດ ແລະ ບໍ່ແຮ່, ຜົນການທົົດລອງທາງດ້ານ ທໍລະນີ-ເຕັກນິກ, ທໍລະນີກໍ່ສ້າງ, ຜົນການວິໄຈແຮ່ທາດ ແລະ ຜະລິດຕະພັນແຮ່ທາດ, ຄຸນນະພາບສິ່ງແວດລ້ອມບໍ່ແຮ່, ດິນ, ຫີນ, ນໍ້າ, ມົນລະພິດທາງອາກາດ ແລະ ສິ່ງເສດເຫຼືອຈາກ ການຂຸດຄົ້ນ ແລະ ປຸງແຕ່ງແຮ່ທາດ ແລະ ດ້ານພະລັງງານ;
- ກວດກາ ແລະ ຢັ້ງຢືນການອະນຸຍາດສົ່ງອອກຕົວຢ່າງອຸດສາຫະກໍາໄປທົດລອງເຕັກໂນໂລຊີ ໃນໄລຍະສ້າງບົດສຶກສາຄວາມເປັນໄປໄດ້ທາງດ້ານເສດຖະກິດ-ເຕັກນິກ ແລະ ໄລຍະພັດທະນາບໍ່ແຮ່ ເພື່ອຄັດເລືອກອຸປະກອນກົນຈັກ ແລະ ເຕັກໂນໂລຊີໃນການປຸງແຕ່ງ;
- ທົດສອບ ແລະ ຢັ້ງຢືນມາດຕະຖານ-ເຕັກນິກຂອງອຸປະກອນກົນຈັກ ທີ່ນໍາໃຊ້ໃນໂຄງການລົງທຶນ ຂອງລັດ, ບັນດາບໍລິສັດລົງທຶນດ້ານພະລັງງານ ແລະ ບໍ່ແຮ່, ໂຄງການຮ່ວມມືກັບເອກະຊົນພາຍໃນ ແລະ ຕ່າງປະເທດ
- ເກັບຕົວຢ່າງແຮ່ທາດ, ຜະລິດຕະພັນແຮ່ທາດ, ດິນ, ນໍ້າ, ສິ່ງເສດເຫຼືອຕ່າງໆ ທີ່ເກີດຈາກໂຄງການ ເພື່ອນໍາມາຄົ້ນຄວ້າ ແລະ ວິໄຈ;
- ເຂົ້າຮ່ວມການປະເມີນຜົນ ແລະ ຢັ້ງຢືນແຜນຄຸ້ມຄອງສິ່ງແວດລ້ອມໃຫ້ເປັນລະບົບ, ປະເມີນຄວາມສ່ຽງ, ຄວາມປອດໄພ, ການປ້ອງກັນສິ່ງແວດລ້ອມ ຂອງບັນດາໂຄງການຂຸດຄົ້ນບໍ່ແຮ່;
- ເຮັດການບໍລິການ ແລະ ໃຫ້ການປຶກສາດ້ານພະລັງງານ, ທໍລະນີສາດ ແລະ ບໍ່ແຮ່;
- ເຂົ້າຮ່ວມ ແລະ ປະກອບຄໍາເຫັນ ໃນກອງປະຊຸມປຶກສາຫາລືທາງດ້ານເຕັກນິກຂອງບັນດາບໍລິສັດລົງທຶນໃນຂະແໜງພະລັງງານ, ທໍລະນີສາດ ແລະ ບໍ່ແຮ່;
- ສົມທົບກັບສະຖາບັນ ແລະ ບັນດາບໍລິສັດ, ລັດວິສາຫະກິດ ກ່ຽວຂ້ອງຂອງສາກົນ ເຮັດການສຶກສາທາງດ້ານວິທະຍາສາດ ແລະ ທົດລອງ ທີ່ກ່ຽວຂ້ອງກັບວຽກງານພະລັງງານ, ທໍລະນີສາດ ແລະ ບໍ່ແຮ່ ເພື່ອແລກປ່ຽນບົດຮຽນ ແລະ ຍາດແຍ່ງການຊ່ວຍເຫຼືອ ຕາມນະໂຍບາຍລວມຂອງພັກ-ລັດ ວາງອອກ;
- ພົວພັນຫ້ອງວິໄຈແຮ່ທາດ ຂອງພາກລັດ, ເອກະຊົນ ທັງພາຍໃນ ແລະ ຕ່າງປະເທດ ແລະ ອົງການຈັດຕັ້ງສາກົນ ທີ່ໄດ້ຮັບອະນຸຍາດຖືກຕ້ອງຕາມກົດໝາຍ ເພື່ອຮ່ວມມື, ທັດສະນະສຶກສາ ແລະ ຖອດຖອນບົດຮຽນໃນການວິໄຈແຮ່ທາດ;
- ເຄື່ອນໄຫວວຽກງານທາງລັດຖະການຢູ່ພາຍໃນ ແລະ ຕ່າງປະເທດ ທີ່ກ່ຽວຂ້ອງກັບວຽກງານຂອງສະຖາບັນ ຫຼື ຕາມການມອບໝາຍຂອງລັດຖະມົນຕີ;
- ຄຸ້ມຄອງ ແລະ ນໍາໃຊ້ງົບປະມານ, ທຶນຝຶກອົບຮົມພະນັກງານ, ກອງທຶນສົ່ງເສີມ ແລະ ພັດທະນາພະລັງງານ ແລະ ຊັບສົມບັດຕ່າງໆ ຕາມການມອບໝາຍຂອງລັດຖະມົນຕີ;
- ຂຶ້ນແຜນ ແລະ ດໍາເນີນການຈັດຝຶກອົບຮົມທາງດ້ານເຕັກນິກວິຊາການ ທີ່ຕິດພັນກັບວຽກງານ ພະລັງງານ, ທໍລະນີສາດ ແລະ ບໍ່ແຮ່;
- ເຊັນເອກະສານທາງລັດຖະການ ທີ່ພົວພັນກັບໜ້າທີ່, ສິດ ແລະ ພາລະບົດບາດຂອງຕົນ;
- ຈັດຕັ້ງປະຕິບັດ ແລະ ດໍາເນີນການປັບປຸງກົງຈັກການຈັດຕັ້ງ, ແຕ່ງຕັ້ງ, ຍົກຍ້າຍ, ປົດຕໍາແໜ່ງ, ບໍາລຸງ, ກໍ່ສ້າງ, ບັນຈຸ, ຊັບຊ້ອນ, ປະຕິບັດວິໄນ ແລະ ນະໂຍບາຍ ແກ່ພະນັກງານ-ລັດຖະກອນ ຂອງສະຖາບັນຕາມການຕົກລົງຂອງລັດຖະມົນຕີ;
- ຄົ້ນຄວ້າ ແລະ ນຳສະເໜີການປະຕິບັດວິໄນ ແລະ ນະໂຍບາຍ ແກ່ການຈັດຕັ້ງ ແລະ ບຸກຄົນ ທັງພາຍໃນ ແລະ ຕ່າງປະເທດ ໃນການຈັດຕັ້ງປະຕິບັດໂຄງການ;
- ປະເມີນຜົນການປະຕິບັດວຽກງານຂອງພະນັກງານ-ລັດຖະກອນປະຈຳປີ, ການຂຶ້ນແຜນກຳນົດພະນັກງານນຳພາ-ຄຸ້ມຄອງ ແລະ ການກຳນົດຕຳແໜ່ງງານຂອງສະຖາບັນໃຫ້ຄົບຖ້ວນ ໂດຍສົມທົບກັບກົມຈັດຕັ້ງ ແລະ ພະນັກງານ ຂອງກະຊວງ;
- ປະຕິບັດໜ້າທີ່ກວດກາລັດໃນຂອບເຂດຄວາມຮັບຜິດຊອບຂອງສະຖາບັນ ແລະ ຕາມການມອບໝາຍຂອງຂັ້ນເທິງ;
- ປະຕິບັດສິດອື່ນໆ ຕາມການມອບໝາຍຂອງລັດຖະມົນຕີ.