ວັນທີ 08 ພຶດສະພາ 2023 ຜ່ານມານີ້, ທ່ານ ໂພໄຊ ໄຊຍະສອນ ກຳມະການສູນກາງພັກ, ເລຂາຄະນະພັກ, ລັດຖະມົນຕີກະຊວງພະລັງງານ ເເລະ ບໍ່ເເຮ່, ໄດ້ລົງຊຸກຍູ້, ພົບປະໂອ້ລົມ ເເລະ ເຮັດວຽກວິຊາສະເພາະ ຢູ່ ສະຖາບັນຄົ້ນຄວ້າພະລັງງານ ເເລະ ບໍ່ເເຮ່ (ສພບ), ໂດຍໃຫ້ການຕ້ອນຮັບຢ່າງອົບອຸ່ນຈາກ ທ່ານ ພູວຽງ ເເກ້ວບຸບຜາ ຫົວໜ້າສະຖາບັນຄົ້ນຄ້ວາພະລັງງານ ເເລະ ບໍ່ເເຮ່ ພ້ອມດ້ວຍຄະນະ ເເລະ ພະນັກງານລັດຖະກອນພາຍໃນສະຖາບັນຄົ້ນຄວ້າພະລັງງານ ແລະ ບໍ່ແຮ່. ຮ່ວມຕິດຕາມເຄື່ອນໄຫວ ທ່ານ ລັດຖະມົນຕີ ຄັ້ງນີ້ ມີ ທ່ານ ຄຳໂສ້ ກຸໂພຄຳ ຄະນະພັກກະຊວງ, ຫົວໜ້າຫ້ອງການກະຊວງພະລັງງານ ເເລະ ບໍ່ເເຮ່.
ໂຄງການຄົ້ນຄວ້ານໍາໃຊ້ເຕັກໂນໂລຊີສະໜອງນໍ້າແບບປະສົມປະສານ ເພື່ອຮັບໃຊ້ການຜະລິດກະສິກໍາ ຢູ່ເມືອງສະໜາມໄຊ, ແຂວງອັດຕະປື ໄດ້ຮັບງົບປະມານຈາກກອງທືນພັດທະນາວິທະຍາສາດ ແລະ ເຕັກໂນໂລຊີ ໂດຍແມ່ນກົມເຕັກໂນໂລຊີ ແລະ ນະວັດຕະກໍາ, ກະຊວງເຕັກໂນໂລຊີ ແລະ ການສື່ສານ ພ້ອມດ້ວຍຄະນະຮັບຜິດຊອບຂັ້ນແຂວງ ໂດຍນຳໃຊ້ວິຊາການພາຍໃນ ເປັນຜູ້ສໍາຫຼວດ ແລະ ຈັດຕັ້ງປະຕິບັດ ຊຶ່ງຈຸດປະສົງຂອງໂຄງການແມ່ນເພື່ອແກ້ໄຂບັນຫາການຂາດແຄນນໍ້າ ແລະ ໄພນໍ້າຖ້ວມສໍາລັບພື້ນທີ່ການຜະລິດກະສິກຳ ໃນເຂດເປົ້າໝາຍ ຄື: ເຂດເນື້ອທີ່ກະສິກໍາບຸກເບີກໃໝ່ດົງບາກ, ເຂດປູກເຂົ້າບ້ານໃໝ່ ແລະ ບ້ານຄັງ ຢູ່ ເມືອງສະໜາມໄຊ, ແຂວງອັດຕະປື ໂດຍໄດ້ສ້າງຕົວແບບລະບົບການສະໜອງນໍ້າແບບປະສົມປະສານ ຊຶ່ງໄດ້ມີການສໍາຫຼວດລະອຽດ, ອອກແບບລະບົບການບໍລິຫານຈັດການນໍ້າ ແລະ ລະບົບປໍ້ານໍ້າໂຊລ່າສູບນໍ້າພະລັງງານແສງຕາເວັນ ເຊັ່ນ: ການສ້າງອ່າງເກັບນ້ຳໃນພື້ນທີ່, ການສູບນໍ້າໃຕ້ດິນເຕີມເຂົ້າອ່າງດ້ວຍລະບົບປໍ້ານໍ້າພະລັງງານແສງຕາເວັນ, ການສ້າງທະນາຄານນໍ້າໃຕ້ດິນ, ສະໜອງເຕັກໂນໂລຊີຜະລິດນໍ້າດື່ມໃຫ້ແກ່ໂຮງຮຽນ ແລະ ການນໍາໃຊ້ກະເສດທິດສະດີໃໝ່.
ໂຄງການດັ່ງກ່າວເປັນໂຄງການໜຶ່ງທີ່ຈໍາເປັນຕ້ອງໄດ້ຈັດຕັ້ງປະຕິບັດຢ່າງຮີບດ່ວນເພື່ອເປັນການພື້ນຟູ ແລະ ພັດທະນາຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບຈາກເຂື່ອນເຊປຽນ-ເຊນ້ຳນ້ອຍແຕກໃນປີ 2019 ໂຄງການດັ່ງກ່າວເປັນບູລິມະສິດສຳຄັນຂອງລັດຖະບານ ຊຶ່ງໄດ້ເລີ່ມຈັດຕັ້ງປະຕິບັດມາ ແຕ່ທ້າຍປີ 2020 ໂດຍໄດ້ແບ່ງ 3 ໄລຍະຄື: ສຳຫຼວດອອກແບບ, ກໍ່ສ້າງຕິດຕັ້ງ ແລະ ຝຶກອົບຮົມສະຫະກອນຜູ້ເຮັດການຜະລິດ. ພາຍຫຼັງໄດ້ສຳເລັດການສຳຫຼວດແລ້ວແມ່ນໄດ້ເລີ່ມຈັດຕັ້ງປະຕິບັດບັນດາກິດຈະກຳໂດຍສະເພາະແມ່ນໄດ້ເລີ່ມກໍ່ສ້າງອ່າງກັກເກັບນ້ຳ ຈຳນວນ 3 ອ່າງ ແລະ ຂຸດລອກໜອງຫຼັກ ຈໍານວນ 1 ອ່າງ ແຕ່ເດືອນ 4 / 2021 ຈົນມາຮອດ ເດືອນ 4 / 2022 ຈຶ່ງໄດ້ກໍ່ສ້າງອ່າງສໍາເລັດ ຄື: ອ່າງເກັບກັກນໍ້າຈຸດທີ 1 (ເຂດສວນມັນ), ອ່າງເກັບກັກນໍ້າຈຸດທີ 2 (ເຂດໜອງແປນ), ອ່າງເກັບກັກນໍ້າຈຸດທີ 3 (ເຂດສ່ວນຫຍ້າ) ແລະ ອ່າງກັກເກັບນໍ້າຈຸດທີ 4 ( ຂຸດລອກໜອງຫຼັກ ), ໄດ້ສໍາເລັດເຈາະນໍ້າບາດານ ແລະ ຕິດຕັ້ງລະບົບສູບນໍ້າໄຟຟ້າແສງຕາເວັນ ຂະໜາດ 14,4 KW ຈໍານວນ 8 ຈຸດ ເຂດດົງບາກ 06 ຈຸດ, ເຂດບ້ານໃໝ່(ທ່າຫີນ) 01 ຈຸດ ແລະ ເຂດບ້ານຄັງ ຈໍານວນ 01 ຈຸດ. ພ້ອມນັ້ນ, ໄດ້ຕິດຕັ້ງເຄື່ອງກັ່ນຕອງນໍ້າສະອາດ ຈໍານວນ 05 ຊຸດ ຄື: ໂຮງຮຽນ ມສ ສະໜາມໄຊ ຈໍານວນ 1 ຊຸດ, ໂຮງຮຽນ ປະຖົມດົງບາກໃໝ່ ຫີນຄໍາ ຈໍານວນ 1 ຊຸດ, ໂຮງຮຽນ ປະຖົມດອນບົກໃໝ່ ທ່າແສງຈັນ ຈໍານວນ 1 ຊຸດ, ໂຮງຮຽນ ປະຖົມຫີນລາດໃໝ່ ຕະມໍຢອດ ຈໍານວນ 1 ຊຸດ ແລະ ໂຮງຮຽນ ປະຖົມສະໜອງໃຕ້ ປິນດົງ ຈໍານວນ 1 ຊຸດ.
ພາຍຫຼັງການຈັດຕັ້ງປະຕິບັດໂຄງການດັ່ງກ່າວແລ້ວຈະຊ່ວຍປັບປຸງຊີວິດການເປັນຢູ່ຂອງປະຊາຊົນຢູ່ເມືອງສະໜາມໄຊໃຫ້ດີຂຶ້ນ ເຊັ່ນ: ເປັນການນໍາໃຊ້ວິທະຍາສາດ ແລະ ເຕັກໂນໂລຊີ ທີ່ທັນສະໄໝ ເພື່ອການບໍລິຫານຈັດການນໍ້າ(ລະດູແລງ, ລະດູຝົນ ແລະ ເກັບນໍ້າໄວ້ໃຊ້), ມີລະບົບສະໜອງນໍ້າໃຫ້ເຂດການຜະລິດກະສິກໍາ ໃນລະດູແລ້ງ, ມີຄະນະກໍາມະການຄຸ້ມຄອງບໍລິຫານຈັດການນໍ້າຂອງຊຸມຊົນ, ປະຊາຊົນມີລາຍຮັບສາມາດເຮັດການຜະລິດໄດ້ໃນລະດູແລ້ງ, ມີນໍ້າດື່ມສະອາດໃຫ້ຄູ ແລະນັກຮຽນ ໂດຍບໍ່ໄດ້ເສຍຄ່າໃຊ້ຈ່າຍ, ປະຊາຊົນມີຄວາມສາມາດໃນການຄຸ້ມຄອງຊັບພະຍາກອນນໍ້າຂອງທ້ອງຖິ່ນ ເພື່ອຮັບປະກັນການພັດທະນາໃນເຂດຊົນນະບົດ, ຮັບມືຕໍ່ການປ່ຽນແປງດິນຟ້າອາກາດ ແລະ ການຫຼຸດຜ່ອນຄວາມສ່ຽງໄພພິບັດ, ເປັນຕົວແບບທີ່ດີ ໃນການຄຸ້ມຄອງຊັບພະຍາກອນນໍ້າໃນທ້ອງຖິ່ນ ທີ່ກ່ຽວຂ້ອງກັບ ລະບົບການສະໜອງນໍ້າ, ການແກ້ໄຂນໍ້າຖ້ວມ, ໄພແຫ້ງແລ້ງ, ນໍ້າໃຕ້ດິນ, ນໍາໃຊ້ເຕັກໂນໂລຊີ ພະລັງງານທົດແທນ ທີ່ສະອາດ ແລະ ເປັນມິດຕໍ່ສິ່ງແວດລ້ອມ, ປະຊາຊົນສາມາດຂະຫຍາຍຜົນການຜະລິດທາງດ້ານກະສິກໍາ, ເພີ່ມລາຍຮັບ, ແກ້ໄຂຊີວິດການເປັນຢູ່ດີຂື້ນ ແລະ ສ້າງຄວາມໝັ້ນຄົງ ທາງດ້ານສະບຽງອາຫານ ແລະ ເຮັດໃຫ້ການພັດທະນາເສດຖະກິດ – ສັງຄົມ ໃຫ້ມີຄວາມຍືນຍົງ.
ກອງປະຊຸມສະຫຼຸບການຈັດຕັ້ງປະຕິບັດໂຄງການ ແລະ ມອບ-ຮັບໂຄງການ ດັ່ງກ່າວ ໄດ້ຈັດຂຶ້ນໃນຕອນເຊົ້າວັນທີ 01 ກຸມພາ 2023 ທີ່ຫ້ອງວ່າການແຂວງ ອັດຕະປື ໂດຍການເຂົ້າຮ່ວມຂອງທ່ານ ສຸມານະ ຈຸລາມະນີ, ຫົວໜ້າກົມເຕັກໂນໂລຊີ ແລະ ນະວັດຕະກຳ, ກະຊວງເຕັກໂນໂລຊີ ແລະ ການສື່ສານ, ທ່ານ ຂັນທອງ ຍິ້ນດາວົງ, ຫົວໜ້າພະແນກ ເຕັກໂນໂລຊີ ແລະ ການສື່ສານ ແຂວງ ອັດຕະປຶ, ມີບັນດາພະແນກການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໃນວັນທີ 27 ມັງກອນ 2023, ທີ ສະຖາບັນຄົ້ນຄວ້າພະລັງງານ ແລະ ບໍ່ແຮ່, ນະຄອນຫຼວງວຽງຈັນ ໄດ້ຕ້ອນຮັບ ນັກສຶກສາ ຈາກພາກວິຊາ ວິສະວະກຳວັດສະດຸສາດ ປີທີ 2 ແລະ ປີທີ 3 ຈຳນວນ 13 ຄົນ ແລະ ຄະນະອາຈານ 7 ທ່ານ ມະຫາວິທະຍາໄລສຸພານຸວົງ ໂດຍມີ ທ່ານ ດຣ ອານຸສັກ ພົງສະຫວັດ ຮອງຫົວໜ້າສະຖາບັນຄົ້ນຄວ້າພະລັງງານ ແລະ ບໍ່ແຮ່, ແລະ ຄະນະເຂົ້າຮ່ວມ. ຈຸດປະສົງການຢ້ຽມຢາມຄັ້ງນີ້ ແມ່ນເພື່ອຮຽນຮູ້-ເຂົ້າໃຈກ່ຽວກັບການທົດລອງທາງດ້ານພະລັງງານ, ຮັບຟັງການບັນລະຍາຍກ່ຽວກັບການນຳໃຊ້ເຕັກໂນໂລຊີຕ່າງໆ ແລະ ພາລະບົບບາດຂອງ ສະຖາບັນຄົ້ນຄວ້າພະລັງງານ ແລະ ບໍ່ແຮ່. ເຊີ່ງຖືເປັນໂອກາດທີ່ດີ ພ້ອມກັນແລກປ່ຽນຄວາມຄິດເຫັນ ການຮ່ວມມືການຄົ້ນຄວ້າໃນຕໍ່ໜ້າ ພ້ອມກັນນີ້ທາງຄະນະ ແລະ ນັກສຶກສາໄດ້ຢ້ຽມຢາມຫ້ອງທົດລອງ ກ່ຽວກັບການຄົ້ນຄວ້າທາງດ້ານພະລັງງານ.
ພາບ ແລະ ຂ່າວ: ສູນຄົ້ນຄວ້າພະລັງງານທົດແທນ ແລະ ພະລັງງານໃໝ່
ໃນຕອນເຊົ້າຂອງວັນທີ 11 ມັງກອນ 2023, ທີ່ຫ້ອງປະຊຸມ ໂຮງແຮມ ດອນຈັນ ພາເລດ, ນະຄອນຫຼວງວຽງຈັນ, ສະຖາບັນຄົ້ນຄວ້າພະລັງງານ ແລະ ບໍ່ແຮ່ ໄດ້ຈັດກອງປະຊຸມເປີດ “ໂຄງການພັດທະນາ ແລະ ສົ່ງເສີມການນຳໃຊ້ລະບົບອົບແຫ້ງພະລັງງານແສງຕາເວັນ ສຳລັບແປຮູບຜະລິດຕະພັນກະສິກຳ ແລະ ສິນຄ້າ ODOP”, ໂດຍໃຫ້ກຽດເປັນປະທານຂອງທ່ານ ພູວຽງ ແກ້ວບຸບຜາ, ຫົວໜ້າ ສະຖາບັນຄົ້ນຄວ້າພະລັງງານ ແລະ ບໍ່ແຮ່, ພ້ອມດ້ວຍບັນດາກົມກອງທີ່ກ່ຽວຂ້ອງ ແລະ ນັກວິຊາການເຂົ້າຮ່ວມ 20 ທ່ານ.ທ່ານປະທານຍັງໄດ້ກ່າວມີຄຳເຫັນວ່າ: ຈຸດປະສົງຂອງກອງປະຊຸມ ໃນມື້ນີ້ ແມ່ນເພື່ອແຈ້ງໃຫ້ບັນດາທ່ານທີ່ມີສ່ວນກ່ຽວຂ້ອງໄດ້ຮັບຮູ້ເຖີງການລິເລິມຈັດຕັ້ງປະຕິບັດໂຄງການດັ່ງກ່າວ ພາຍຫຼັງທີ່ໂຄງການໄດ້ຖືກຮັບຮອງ ແລະ ອະນຸມັດໃນການສະໜັບສະໜູນທາງດ້ານງົບປະມານຈາກກອງທຶນການຮ່ວມມືແມ່ຂອງ-ເກົາຫຼີ, ຊຶ່ງມີສະຖາບັນແມ່ນໍ້າຂອງເປັນອົງການບໍລິຫານ. ໂຄງການນີ້ຈະຈັດຕັ້ງປະຕິບັດຢູ່ 2 ປີ ເລີ່ມແຕ່ເດືອນມັງກອນ 2023 ຫາ ເດືອນທັນວາ 2024, ໂດຍສະຖາບັນຄົ້ນຄວ້າພະລັງງານ ແລະ ບໍ່ແຮ່ ເປັນໜ່ວຍງານຫຼັກໃນການຈັດຕັ້ງປະຕິບັດ ແລະ ມີທີ່ປຶກສາຈາກພາຍໃນ ແລະຕ່າງປະເທດ.ປະຈຸບັນ ລັດຖະບານ ກຳລັງສຸມໃສ່ການຈັດຕັງປະຕິບັດໂຄງການຄໍ້າປະກັນສະບຽງອາຫານແລະ ການຜະລິດເປັນສິນຄ້າເພື່ອຊົມໃຊ້ພາຍໃນ ແລະ ສົ່ງອອກຂາຍຕ່າງປະເທດ. ບັນຫາສຳຄັນທີ່ເປັນສິ່ງທ້າທ້າຍໃຫ້ສິນຄ້າລາວເຮົາເພື່ອໃຫ້ເປັນທີ່ຍອມຮັບຂອງຕະຫຼາດ ແລະ ຂໍ້ອ້າງໃນການກີດກັນ, ແຂ່ງຂັນ ຫຼື ຍາດແຍ່ງຕະຫຼາດກັບຕ່າງປະເທດ ແມ່ນບັນຫາເລື່ອງຄຸນະພາບ, ຄວາມສະອາດ ແລະ ມາດຕະຖານຂອງສິນຄ້າ. ສຳລັບຜົນຜະລິດກະສີກຳ ຄວາມຊຸ່ມເປັນບັນຫາສຳຄັນຕໍ່ຄຸນະພາບ ແລະ ການເກັບຮັກສາ, ນອກຈາກນີ້ຜະລິດຕະພັນອົບແຫ້ງ ຍັງໄດ້ເອົາໃຈໃສ່ເລື່ອງຄວາມສະອາດ ປາສະຈາກສິ່ງປົນເປື້ອນ ແລະ ຖຶກຫຼັກອະນາໄມ.ວິທີການອົບແຫ້ງ ຫຼື ຕາກແຫ້ງ ໄດ້ຖືກນຳໃຊ້ມາເປັນເວລາດົນນານແລ້ວ ເພື່ອຊ່ວຍຫຼຸດຜ່ອນຄວາມຊຸ່ມໃນວັດຖຸ ຫຼື ຜົນຜະລິດກະສີກຳ ເຮັດໃຫ້ເກັບຮັກສາໄວ້ໄດ້ດົນ, ຊ່ວຍແກ້ບັນຫາການເຊື່ອມຄຸນນະພາບ, ເຊື່ອມລາຄາຂອງຜົນຜະລິດ ແລະ ແກ້ໄຂບັນຫາຜົນຜະລິດລົ້ນຕະຫຼາດ ໃນລະດູເກັບກຽ່ວ. ນອກຈາກນັ້ນຍັງແປຮູບເປັນຜະລິດຕະພັນອົບແຫ້ງເປັນສິນຄ້າ ເພື່ອເພີ່ມມູນຄ່າ ແລະ ສ້າງລາຍຮັບໄດ້ອີກທາງໜຶ່ງ. ເຕັກນິກການອົບແຫ້ງສ່ວນໃຫຍ່ແມ່ນນຳໃຊ້ວິທີການແບບທຳມະຊາດ ໂດຍສະເພາະການຕາກແດດໂດຍກົງ ເພາະເປັນວິທີທີ່ງ່າຍ ແລະ ມີຕົ້ນທຶນຕໍ່າ, ແຕ່ຈະໄດ້ຜົນຜະລິດທີ່ມີຄຸນນະພາບຕໍ່າ ແລະ ມີບັນຫາເລື່ອງຄວາມສະອາດ ເພາະວ່າມີການປົນເປື້ອນຂີ້ຝຸ່ນ, ສັດ, ແມງໄມ້, ແມງວັນລົບກວນ. ນອກຈາກນີ້ການຕາກແຫ້ງຍັງຂຶ້ນກັບສະພາບອາກາດ ຖ້າຟ້າບົດ ຫຼື ຝົນຕົກເຮັດໃຫ້ວັດຖຸທີ່ຕາກບໍ່ແຫ້ງດີ ເກີດຄວາມສ່ຽງ ເຮັດໃຫ້ເກີດເຊຶ້ອລາ ແລະ ເນົ່າເສຍ.ໂຄງການດັ່ງກ່າວໄດ້ມີການອອກແບບ ແລະ ພັດທະນາເຄື່ອງອົບແຫ້ງໃຫ້ແທດເໝາະກັບການອົບແຫ້ງຜະລິດຕະພັນກະສີກຳແຕ່ລະຊະນິດ ໂດຍນໍາໃຊ້ວັດຖຸດິບທີ່ຫາໄດ້ໃນທ້ອງຖິ່ນ ແນ່ໃສ່ຫຼຸດຜ່ອນຕົ້ນທຶນ ແລະ ຊາວກະສິກອນສາມາດຜະລິດໃຊ້ເອງໄດ້, ສົ່ງເສີມການນຳໃຊ້ເຕັກໂນໂລຊີອົບແຫ້ງໃຫ້ແກ່ຊາວກະສິກອນ ເພື່ອຫຼຸດຜ່ອນການສູນເສຍ, ການເຊື່ອມຄຸນນະພາບ ແລະ ການເຊື່ອມມູນຄ່າຂອງຜົນຜະລິດກະສີກຳ ຫຼັງການເກັບກ່ຽວ, ເພີ່ມມູນຄ່າໃຫ້ຜົນຜະລິດກະສີກຳດ້ວຍການແປຮູບເປັນສິນຄ້າ. ນອກຈາກນັ້ນ, ຍັງເປັນການສ້າງຄວາມອາດສາມາດໃຫ້ແກ່ນັກວິຊາການທ້ອງຖິ່ນໃນການບໍລິການໃຫ້ຄຳປືກສາ, ອອກແບບເຄື່ອງອົບແຫ້ງ ແລະ ບໍລິການຕິດຕັ້ງເຄື່ອງອົບທີ່ແທດເໝາະກັບຄວາມຕ້ອງການຢູ່ທ້ອງຖິ່ນຂອງຕົນ.
ຂ່າວ: ສະຖາບັນຄົ້ນຄວ້າພະລັງງານ ແລະ ບໍ່ແຮ່
ໃນວັນທີ 5 ມັງກອນ 2023 ທີ່ຜ່ານມາ, ທີ່ຫ້ອງປະຊຸມ ຂອງສະຖາບັນຄົ້ນຄວ້າພະລັງງານ ແລະ ບໍ່ແຮ່, ບ້ານດົງໝາກຄາຍ, ເມືອງໄຊທານີ ໄດ້ຈັດຊຸດຝຶກອົບຮົມຂື້ນໃນຫົວຂໍ້ “ຄວາມຮູ້ພື້ນຖານການຜະລິດ ໄຮໂດເຈນ ແລະ ອາໂມເນຍສີຂຽວ”, ໂດຍໃຫ້ກຽດເປັນປະທານຂອງທ່ານ ພູວຽງ ແກ້ວບຸບຜາ, ຫົວໜ້າ ສະຖາບັນຄົ້ນຄວ້າພະລັງງານ ແລະ ບໍ່ແຮ່, ທ່ານ ເພັດສະຫວັນ ລັດຕະນະທົງໄຊ, ຫົວໜ້າກົມຄຸ້ມຄອງພະລັງງານ, ໂດຍມີບັນດາກົມກອງທີ່ກ່ຽວຂ້ອງເຂົ້າຮ່ວມ 15 ທ່ານ,
ທ່ານປະທານຍັງໄດ້ກ່າວມີຄຳເຫັນຕໍ່ຊຸດຝຶກອົບຮົມວ່າ: ຈຸດປະສົງຂອງການຝຶກອົບຮົມແມ່ນເພື່ອເຜີຍແຜ່ຄວາມຮູ້ຄວາມເຂົ້າໃຈໃນເບື້ອງຕົ້ນ ກ່ຽວກັບການກວດສອບ, ວິເຄາະທາງດ້ານເຕັກນິກ, ເສດຖະກິດສັງຄົມ-ສິ່ງແວດລ້ອມ ແລະ ຄວາມເປັນໄປໄດ້ ທີ່ຈະເພີ່ມມູນຄ່າທາງດ້ານເສດຖະກິດ ແລະ ກາຍເປັນຜູ້ນຳໃນລະດັບພູມິພາກ ໃນການຜະລິດ ໄຮໂດເຈນ ແລະ ອາໂມເນຍສີຂຽວທີ່ເປັນມິດຕໍ່ສີ່ງແວດລ້ອມ.
ຊຸດຝຶກອົບຮົມເຫັນວ່າມີຜົນປະໂຫຍດສໍາລັບການສ້າງຄວາມສາມາດທາງດ້ານວິຊາການໃຫ້ບຸກຄະລາກອນພາກລັດເຮົາໃນການຮຽນຮູ້ກ່ຽວກັບວຽກງານພະລັງງານໄຮໂດເຈນ ແລະ ອາໂມເນຍສີຂຽວ ແລະ ເຂົ້າໃຈໃນບັນດາທາງເລືອກໃນການສະໜອງພະລັງງານເປັນຕົ້ນແມ່ນ ການຫັນປ່ຽນພະລັງງານທົດແທນໄປສູ່ພະລັງງານສະອາດ ໃນ ສປປ ລາວ ແລະ ເສັ້ນທາງເຕັກໂນໂລຊີທາງເລືອກທີ່ຈະຊ່ວຍໃຫ້ສາມາດປ່ຽນໄປສູ່ລະບົບພະລັງງານປ່ອຍມົນລະພິດເປັນສູນ.
ການຝືກອົບຮົມໃນຄັ້ງນີ້ ແມ່ນຈັດຂື້ນ ໂດຍການຮ່ວມມືກັນລະຫວ່າງ ສະຖາບັນຄົ້ນຄວ້າພະລັງງານ ແລະ ບໍ່ແຮ່, ກົມສົ່ງເສີມ ແລະ ປະຫຍັດພະລັງງານ ຂອງ (ກະຊວງພະລັງງານ ແລະ ບໍ່ແຮ່) ຮ່ວມກັບສະຖາບັນອານາຄົດພູມມີພາກລຸ່ມແມ່ນ້ຳຂອງ (MERFI) ເພື່ອດໍາເນີນໂຄງການ “ການຫັນປ່ຽນພະລັງງານ ຢູ່ໃນ ສປປ ລາວ” ໂດຍໄດ້ຮັບທຶນສະໜັບສະໜູນ ຈາກລັດຖະບານອົດສະຕາຣີ ຜ່ານໂຄງການເພື່ອຮ່ວມມື ແລະ ຊ່ວຍເຫຼືອ ໂຄງລ່າງພື້ນຖານ (P4I).
ໃຫ້ກຽດບັນຍາຍເປັນຄູຝຶກໂດຍທ່ານ Dr. John Ward ໄດ້ໃຫ້ຮູ້ວ່າ: ຫຼັກສູດດັ່ງກ່າວເປັນສ່ວນໜຶ່ງທີ່ສຳຄັນໃນການປະກອບສ່ວນ ຂອງໂຄງການ, ການສື່ສານ ແລະ ການສ້າງຄວາມອາດສາມາດ ຊຶ່ງເປັນໜຶ່ງໃນເສົາຄ້ຳທີ່ຈະຊ່ວຍໃຫ້ ສປປ ລາວ ກ້າວເຂົ້າສູ່ເສດຖະກິດ ກຣີນໄຮໂດຼເຈນ-ອາໂມເນຍ ໃນພູມມິພາກອາຊີ. ຈະໄດ້ຮຽນຮູ້ເຂົ້າໃຈຢ່າງເລິກເຊິ່ງກ່ຽວກັບບົດບາດ ການເຮັດວຽກ ຂອງ H2NH3 ວ່າມີຄຸນປະໂຫຍດໃນການນຳໃຊ້ແບບໃດ.
ຊຶ່ງຈະເນັ້ນໃສ່ 6 ຫົວຂໍ້ຄື:
1. ການວາງແຜນການຜະລິດພະລັງງານ H2NH3 ແລະ ການປ່ອຍອາຍພິດ GHG ມີຄືແນວໃດ;
2. ການຜະລິດ H2NH3 ໂດຍນຳໃຊ້ກະແສໄຟຟ້າ decarbonized, ທ່າແຮ່ງໃນການຜະລິດພະລັງງານຈາກຖ່ານຫີນ;
3. ທ່ານແຮງຂອງ NH3 ອາໂມເນຍ ສີຂຽວ ຊຶ່ງເປັນວັດຖຸດິບທີ່ສາມາດນຳໃຊ້ແທນ ໃນອົງປະກອບການຜະລິດປຸຍ; ແລະ ຊ່ວຍຫຼຸດການປ່ອຍອາຍກາກບອນ ໃນສປປ ລາວ;
4. ເປັນພະລັງງານທາງເລືອກອີກທາງໜຶ່ງ ໃນການທົດແທນການນຳເຂົ້ານ້ຳມັນ ແລະ ລົດທີ່ແລ່ນດ້ວຍພະລັງງານໄຟຟ້າ, ລວມທັງຄຸນປະໂຫຍດທາງເຄມີຂອງ ໄຮໂດຼເຈນ ແລະ ອາໂມເນຍ.
5. H2NH3 ມີຄຸນປະໂຫຍດຫຼາຍທາງດ້ານເສດຖະກິດ, ໃນ ສປປ ລາວ ແມ່ນມີທ່າແຮງໃນການຜະລິດ ໄຮໂດຼເຈນ ແລະ ອາໂມເນຍ ແລະ ສາມາດເປັນປະເທດທີ່ສົ່ງອອກຜະລິດຕະພັນດັ່ງກ່າວໃນອາຊີ ຖັດຈາກ ປະເທດອອສເຕເລຍ ແລະ ເຢຍລະມັນ.
6. ການນຳໃຊ້ H2NH3 ເຂົ້າໃນອຸດສາຫະກຳຍານຍົນ ແລະ ນະໂຍບາຍການນຳໃຊ້ພະລັງງານທົດແທນ ໃນສປປ ລາວ, ທົ່ວໂລກກຳລັງຫັນການນຳໃຊ້ພະລັງງານທົດແທນ ສີຂຽວ ເຂົ້າໃນການດຳລົງຊີວິດປະຈຳວັນ ເພາະເປັນພະລັງງານ ທີ່ສະອາດ, ປອດໄພ ແລະ ເປັນມິດກັບສິ່ງແວດລ້ອມ.
ຂ່າວ: ສະຖາບັນຄົ້ນຄວ້າພະລັງງານ ແລະ ບໍ່ແຮ່
ໃນວັນທີ 29 ພະຈິກນີ້, ສາມອົງການຈັດຕັ້ງສະຖາບັນຄົ້ນຄວ້າ ພະລັງງານ ແລະ ບໍ່ແຮ່, ກະຊວງພະລັງງານ ແລະ ບໍ່ແຮ່ ໄດ້ພ້ອມກັນສ້າງຂະບວນການອອກແຮງງານ ອະນາໄມລວມ ເພື່ອຂໍ່ານັບຮັບຕ້ອນວັນສໍາຄັນຕ່າງໆຂອງພັກ, ຂອງຊາດ. ເພື່ອສ້າງຂະບວນການຄຳນັບຮັບຕອນ ວັນທີ່ 2 ທັນວາ ຄົບຮອບ 47 ປີ, ຄົບຮອບ ວັນເກີດ ປະທານໄກສອນ ພົມວິຫານ ຄົບຮອບ 102 ປີ ແລະ ທັງເປັນການຈັດຕັ້ງປະຕິບັດຕາມເນື້ອໃນຈິດໃຈຂອງ ຂໍ້ແຂ່ງຂັ້ນ 4 ບຸກ.
ການອອກແຮງງານໃນຄັ້ງນີ້, ແມ່ນໄດ້ພ້ອມກັນເຮັດອະນາໄມປັດກວາດຂີ້ເຫຍື້ອ, ເກັບມ້ຽນຂີ້ເຫຍື້ອ, ກະໂປະ-ກະປ໋ອງ, ສິ່ງກີດຂວາງທີ່ຮົກເຮື້ອຕາມແຄມທາງ ເສັ້ນທາງໜ້າຂອງສະຖາບັນ ໃຫ້ມີຄວາມສະອາດຈົບງາມແລະມີຄວາມເປັນລະບຽບຮຽບຮ້ອຍ.
ທີມງານຂ່າວ ສະຖາບັນຄົ້ນຄວ້າ ພະລັງງານ ແລະ ບໍ່ແຮ່
ສະຖາບັນຄົ້ນຄວ້າພະລັງງານ ແລະ ບໍ່ແຮ່, ກະຊວງພະລັງງານ ແລະ ບໍ່ແຮ່ ໄດ້ເປີດຊຸດຝຶກອົບຮົມກ່ຽວກັບວຽກງານດ້ານທໍລະນີສາດ ແລະ ບໍ່ແຮ່ ຂຶ້ນໃນລະຫວ່າງ ວັນທີ 20-22 ກັນຍາ 2022 ທີ່ ໂຮງແຮມດອກຈຳປາ, ເມືອງປາກຊັນ, ແຂວງ ບໍລິຄຳໄຊ. ເພື່ອສ້າງຄວາມເຂັ້ມແຂງທາງດ້ານວິຊາການໃຫ້ແກ່ບັນດາຂະແໜງການວຽກງານທາງດ້ານທໍລະນີສາດ ແລະ ບໍ່ແຮ່ໃຫ້ກັບ ພະແນກພະລັງງານ ແລະ ບໍ່ແຮ່ແຂວງ ໃນການຕິດຕາມກວດການຳບັນດາຜູ້ປະກອບການຂຸດຄົ້ນບໍ່ແຮ່ ທັງພາຍໃນ ແລະ ຕ່າງປະເທດ ໃຫ້ມີປະສິດທິພາບ ແລະ ໄດ້ຮັບຜົນປະໂຫຍດສູງສຸດ. ໂດຍໄດ້ເຊື້ອເຊີນ ພະແນກພະລັງງານ ແລະ ບໍ່ແຮ່ ແຂວງຫົວພັນ, ແຂວງ ຊຽງຂວາງ, ແຂວງໄຊສົມບູນ, ນະຄອນຫຼວງວຽງຈັນ, ແຂວງຄຳມ່ວນ ແລະ ແຂວງ ສະຫວັນນະເຂດ ເຂົ້າຮ່ວມ ລວມທັງໝົດຫຼາຍກວ່າ 50 ທ່ານ ໂດຍປະກອບດ້ວຍ 5 ຫົວຂໍ້ການຝຶກອົບຮົມ ດັ່ງນີ້:
- ໂຄງສ້າງ ແລະ ເຕັກນິກພື້ນຖານຂອງການຂຸດຄົ້ນຫີນປູນແບບເປີດໜ້າດິນ.
- ໂຄງສ້າງ ແລະ ເຕັກນິກພື້ນຖານຂອງການຂຸດຄົ້ນຖ່ານຫີນແບບໃຕ້ດິນ.
- ການຂຸດຄົ້ນ ແບບບໍ່ເປີດໜ້າດິນ ແລະ ພາກຄິດໄລ່ຕົວຈິງ.
- ວຽກງານຊີເຈາະ ແລະ ລະເບີດ.
- ການຂົນສົ່ງໃນສະໜາມຂຸດຄົ້ນ
ນອກຈາກນັ້ນ, ກໍຍັງໄດ້ນຳພານັກສຳມະນາກອນລົງຢ້ຽມຢາມສະຖານທີ່ຂຸດຄົ້ນຫິນປູນ ເພື່ອໃຫ້ນັກສຳມະນາກອນໄດ້ເຂົ້າໃຈ ແລະ ຮຽນຮູ້ວຽກງານຂຸດຄົ້ນພາກສະໜາມຕົວຈິງໃຫ້ຫຼາຍຂຶ້ນ.
ພາບ ແລະ ຂ່າວ: ສູນຝຶກອົບຮົມພະລັງງານ, ທໍລະນີສາດ ແລະ ບໍ່ແຮ່
ໃນວັນທີ 15/9/2022, ທີ່ຫ້ອງປະຊຸມໃຫຍ່ ກົມແຜນການ ແລະ ການຮ່ວມມື. ສະຖາບັນຄົ້ນຄວ້າພະລັງງານ ແລະ ບໍ່ແຮ່ ໂດຍການເປັນປະທານຂອງ ທ່ານ ປອ ອານຸສັກ ພົງສະຫວັດ, ຮອງຫົວໜ້າສະຖາບັນ ໄດ້ຈັດກອງປະຊຸມທາງໄກ (video conference) ຂອງຄະນະໜ່ວຍງານ ວິຊາການ ຮ່ວມມືລາວ-ຣັດເຊຍ ລັດວິສາຫະກິດ ປາລະມະນູ ໂຣຊາຕອມ “Rosatom” ໃນການປຶກສາຫາລື ວ່າດ້ວຍການຮ່ວມມືທາງດ້ານການນໍາໃຊ້ ພະລັງງານນິວເຄຼຍໃນທາງສັນຕິ.
ພາບ ແລະ ຂ່າວໂດຍ: ສູນຄົ້ນຄວ້າພະລັງງານທົດແທນ ແລະ ພະລັງງານໃໝ່
Newer Posts