ໂຄງການຄົ້ນຄວ້ານໍາໃຊ້ເຕັກໂນໂລຊີສະໜອງນໍ້າແບບປະສົມປະສານ ເພື່ອຮັບໃຊ້ການຜະລິດກະສິກໍາ ຢູ່ເມືອງສະໜາມໄຊ, ແຂວງອັດຕະປື ໄດ້ຮັບງົບປະມານຈາກກອງທືນພັດທະນາວິທະຍາສາດ ແລະ ເຕັກໂນໂລຊີ ໂດຍແມ່ນກົມເຕັກໂນໂລຊີ ແລະ ນະວັດຕະກໍາ, ກະຊວງເຕັກໂນໂລຊີ ແລະ ການສື່ສານ ພ້ອມດ້ວຍຄະນະຮັບຜິດຊອບຂັ້ນແຂວງ ໂດຍນຳໃຊ້ວິຊາການພາຍໃນ ເປັນຜູ້ສໍາຫຼວດ ແລະ ຈັດຕັ້ງປະຕິບັດ ຊຶ່ງຈຸດປະສົງຂອງໂຄງການແມ່ນເພື່ອແກ້ໄຂບັນຫາການຂາດແຄນນໍ້າ ແລະ ໄພນໍ້າຖ້ວມສໍາລັບພື້ນທີ່ການຜະລິດກະສິກຳ ໃນເຂດເປົ້າໝາຍ ຄື: ເຂດເນື້ອທີ່ກະສິກໍາບຸກເບີກໃໝ່ດົງບາກ, ເຂດປູກເຂົ້າບ້ານໃໝ່ ແລະ ບ້ານຄັງ ຢູ່ ເມືອງສະໜາມໄຊ, ແຂວງອັດຕະປື ໂດຍໄດ້ສ້າງຕົວແບບລະບົບການສະໜອງນໍ້າແບບປະສົມປະສານ ຊຶ່ງໄດ້ມີການສໍາຫຼວດລະອຽດ, ອອກແບບລະບົບການບໍລິຫານຈັດການນໍ້າ ແລະ ລະບົບປໍ້ານໍ້າໂຊລ່າສູບນໍ້າພະລັງງານແສງຕາເວັນ ເຊັ່ນ: ການສ້າງອ່າງເກັບນ້ຳໃນພື້ນທີ່, ການສູບນໍ້າໃຕ້ດິນເຕີມເຂົ້າອ່າງດ້ວຍລະບົບປໍ້ານໍ້າພະລັງງານແສງຕາເວັນ, ການສ້າງທະນາຄານນໍ້າໃຕ້ດິນ, ສະໜອງເຕັກໂນໂລຊີຜະລິດນໍ້າດື່ມໃຫ້ແກ່ໂຮງຮຽນ ແລະ ການນໍາໃຊ້ກະເສດທິດສະດີໃໝ່.
ໂຄງການດັ່ງກ່າວເປັນໂຄງການໜຶ່ງທີ່ຈໍາເປັນຕ້ອງໄດ້ຈັດຕັ້ງປະຕິບັດຢ່າງຮີບດ່ວນເພື່ອເປັນການພື້ນຟູ ແລະ ພັດທະນາຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບຈາກເຂື່ອນເຊປຽນ-ເຊນ້ຳນ້ອຍແຕກໃນປີ 2019 ໂຄງການດັ່ງກ່າວເປັນບູລິມະສິດສຳຄັນຂອງລັດຖະບານ ຊຶ່ງໄດ້ເລີ່ມຈັດຕັ້ງປະຕິບັດມາ ແຕ່ທ້າຍປີ 2020 ໂດຍໄດ້ແບ່ງ 3 ໄລຍະຄື: ສຳຫຼວດອອກແບບ, ກໍ່ສ້າງຕິດຕັ້ງ ແລະ ຝຶກອົບຮົມສະຫະກອນຜູ້ເຮັດການຜະລິດ. ພາຍຫຼັງໄດ້ສຳເລັດການສຳຫຼວດແລ້ວແມ່ນໄດ້ເລີ່ມຈັດຕັ້ງປະຕິບັດບັນດາກິດຈະກຳໂດຍສະເພາະແມ່ນໄດ້ເລີ່ມກໍ່ສ້າງອ່າງກັກເກັບນ້ຳ ຈຳນວນ 3 ອ່າງ ແລະ ຂຸດລອກໜອງຫຼັກ ຈໍານວນ 1 ອ່າງ ແຕ່ເດືອນ 4 / 2021 ຈົນມາຮອດ ເດືອນ 4 / 2022 ຈຶ່ງໄດ້ກໍ່ສ້າງອ່າງສໍາເລັດ ຄື: ອ່າງເກັບກັກນໍ້າຈຸດທີ 1 (ເຂດສວນມັນ), ອ່າງເກັບກັກນໍ້າຈຸດທີ 2 (ເຂດໜອງແປນ), ອ່າງເກັບກັກນໍ້າຈຸດທີ 3 (ເຂດສ່ວນຫຍ້າ) ແລະ ອ່າງກັກເກັບນໍ້າຈຸດທີ 4 ( ຂຸດລອກໜອງຫຼັກ ), ໄດ້ສໍາເລັດເຈາະນໍ້າບາດານ ແລະ ຕິດຕັ້ງລະບົບສູບນໍ້າໄຟຟ້າແສງຕາເວັນ ຂະໜາດ 14,4 KW ຈໍານວນ 8 ຈຸດ ເຂດດົງບາກ 06 ຈຸດ, ເຂດບ້ານໃໝ່(ທ່າຫີນ) 01 ຈຸດ ແລະ ເຂດບ້ານຄັງ ຈໍານວນ 01 ຈຸດ. ພ້ອມນັ້ນ, ໄດ້ຕິດຕັ້ງເຄື່ອງກັ່ນຕອງນໍ້າສະອາດ ຈໍານວນ 05 ຊຸດ ຄື: ໂຮງຮຽນ ມສ ສະໜາມໄຊ ຈໍານວນ 1 ຊຸດ, ໂຮງຮຽນ ປະຖົມດົງບາກໃໝ່ ຫີນຄໍາ ຈໍານວນ 1 ຊຸດ, ໂຮງຮຽນ ປະຖົມດອນບົກໃໝ່ ທ່າແສງຈັນ ຈໍານວນ 1 ຊຸດ, ໂຮງຮຽນ ປະຖົມຫີນລາດໃໝ່ ຕະມໍຢອດ ຈໍານວນ 1 ຊຸດ ແລະ ໂຮງຮຽນ ປະຖົມສະໜອງໃຕ້ ປິນດົງ ຈໍານວນ 1 ຊຸດ.
ພາຍຫຼັງການຈັດຕັ້ງປະຕິບັດໂຄງການດັ່ງກ່າວແລ້ວຈະຊ່ວຍປັບປຸງຊີວິດການເປັນຢູ່ຂອງປະຊາຊົນຢູ່ເມືອງສະໜາມໄຊໃຫ້ດີຂຶ້ນ ເຊັ່ນ: ເປັນການນໍາໃຊ້ວິທະຍາສາດ ແລະ ເຕັກໂນໂລຊີ ທີ່ທັນສະໄໝ ເພື່ອການບໍລິຫານຈັດການນໍ້າ(ລະດູແລງ, ລະດູຝົນ ແລະ ເກັບນໍ້າໄວ້ໃຊ້), ມີລະບົບສະໜອງນໍ້າໃຫ້ເຂດການຜະລິດກະສິກໍາ ໃນລະດູແລ້ງ, ມີຄະນະກໍາມະການຄຸ້ມຄອງບໍລິຫານຈັດການນໍ້າຂອງຊຸມຊົນ, ປະຊາຊົນມີລາຍຮັບສາມາດເຮັດການຜະລິດໄດ້ໃນລະດູແລ້ງ, ມີນໍ້າດື່ມສະອາດໃຫ້ຄູ ແລະນັກຮຽນ ໂດຍບໍ່ໄດ້ເສຍຄ່າໃຊ້ຈ່າຍ, ປະຊາຊົນມີຄວາມສາມາດໃນການຄຸ້ມຄອງຊັບພະຍາກອນນໍ້າຂອງທ້ອງຖິ່ນ ເພື່ອຮັບປະກັນການພັດທະນາໃນເຂດຊົນນະບົດ, ຮັບມືຕໍ່ການປ່ຽນແປງດິນຟ້າອາກາດ ແລະ ການຫຼຸດຜ່ອນຄວາມສ່ຽງໄພພິບັດ, ເປັນຕົວແບບທີ່ດີ ໃນການຄຸ້ມຄອງຊັບພະຍາກອນນໍ້າໃນທ້ອງຖິ່ນ ທີ່ກ່ຽວຂ້ອງກັບ ລະບົບການສະໜອງນໍ້າ, ການແກ້ໄຂນໍ້າຖ້ວມ, ໄພແຫ້ງແລ້ງ, ນໍ້າໃຕ້ດິນ, ນໍາໃຊ້ເຕັກໂນໂລຊີ ພະລັງງານທົດແທນ ທີ່ສະອາດ ແລະ ເປັນມິດຕໍ່ສິ່ງແວດລ້ອມ, ປະຊາຊົນສາມາດຂະຫຍາຍຜົນການຜະລິດທາງດ້ານກະສິກໍາ, ເພີ່ມລາຍຮັບ, ແກ້ໄຂຊີວິດການເປັນຢູ່ດີຂື້ນ ແລະ ສ້າງຄວາມໝັ້ນຄົງ ທາງດ້ານສະບຽງອາຫານ ແລະ ເຮັດໃຫ້ການພັດທະນາເສດຖະກິດ – ສັງຄົມ ໃຫ້ມີຄວາມຍືນຍົງ.
ກອງປະຊຸມສະຫຼຸບການຈັດຕັ້ງປະຕິບັດໂຄງການ ແລະ ມອບ-ຮັບໂຄງການ ດັ່ງກ່າວ ໄດ້ຈັດຂຶ້ນໃນຕອນເຊົ້າວັນທີ 01 ກຸມພາ 2023 ທີ່ຫ້ອງວ່າການແຂວງ ອັດຕະປື ໂດຍການເຂົ້າຮ່ວມຂອງທ່ານ ສຸມານະ ຈຸລາມະນີ, ຫົວໜ້າກົມເຕັກໂນໂລຊີ ແລະ ນະວັດຕະກຳ, ກະຊວງເຕັກໂນໂລຊີ ແລະ ການສື່ສານ, ທ່ານ ຂັນທອງ ຍິ້ນດາວົງ, ຫົວໜ້າພະແນກ ເຕັກໂນໂລຊີ ແລະ ການສື່ສານ ແຂວງ ອັດຕະປຶ, ມີບັນດາພະແນກການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໃນວັນທີ 29 ພະຈິກນີ້, ສາມອົງການຈັດຕັ້ງສະຖາບັນຄົ້ນຄວ້າ ພະລັງງານ ແລະ ບໍ່ແຮ່, ກະຊວງພະລັງງານ ແລະ ບໍ່ແຮ່ ໄດ້ພ້ອມກັນສ້າງຂະບວນການອອກແຮງງານ ອະນາໄມລວມ ເພື່ອຂໍ່ານັບຮັບຕ້ອນວັນສໍາຄັນຕ່າງໆຂອງພັກ, ຂອງຊາດ. ເພື່ອສ້າງຂະບວນການຄຳນັບຮັບຕອນ ວັນທີ່ 2 ທັນວາ ຄົບຮອບ 47 ປີ, ຄົບຮອບ ວັນເກີດ ປະທານໄກສອນ ພົມວິຫານ ຄົບຮອບ 102 ປີ ແລະ ທັງເປັນການຈັດຕັ້ງປະຕິບັດຕາມເນື້ອໃນຈິດໃຈຂອງ ຂໍ້ແຂ່ງຂັ້ນ 4 ບຸກ.
ການອອກແຮງງານໃນຄັ້ງນີ້, ແມ່ນໄດ້ພ້ອມກັນເຮັດອະນາໄມປັດກວາດຂີ້ເຫຍື້ອ, ເກັບມ້ຽນຂີ້ເຫຍື້ອ, ກະໂປະ-ກະປ໋ອງ, ສິ່ງກີດຂວາງທີ່ຮົກເຮື້ອຕາມແຄມທາງ ເສັ້ນທາງໜ້າຂອງສະຖາບັນ ໃຫ້ມີຄວາມສະອາດຈົບງາມແລະມີຄວາມເປັນລະບຽບຮຽບຮ້ອຍ.
ທີມງານຂ່າວ ສະຖາບັນຄົ້ນຄວ້າ ພະລັງງານ ແລະ ບໍ່ແຮ່
ໃນວັນທີ 15/9/2022, ທີ່ຫ້ອງປະຊຸມໃຫຍ່ ກົມແຜນການ ແລະ ການຮ່ວມມື. ສະຖາບັນຄົ້ນຄວ້າພະລັງງານ ແລະ ບໍ່ແຮ່ ໂດຍການເປັນປະທານຂອງ ທ່ານ ປອ ອານຸສັກ ພົງສະຫວັດ, ຮອງຫົວໜ້າສະຖາບັນ ໄດ້ຈັດກອງປະຊຸມທາງໄກ (video conference) ຂອງຄະນະໜ່ວຍງານ ວິຊາການ ຮ່ວມມືລາວ-ຣັດເຊຍ ລັດວິສາຫະກິດ ປາລະມະນູ ໂຣຊາຕອມ “Rosatom” ໃນການປຶກສາຫາລື ວ່າດ້ວຍການຮ່ວມມືທາງດ້ານການນໍາໃຊ້ ພະລັງງານນິວເຄຼຍໃນທາງສັນຕິ.
ພາບ ແລະ ຂ່າວໂດຍ: ສູນຄົ້ນຄວ້າພະລັງງານທົດແທນ ແລະ ພະລັງງານໃໝ່
ໃນຕອນເຊົ້າວັນທີ 2 ມິຖຸນາ 2022 ຄະນະສະຖາບັນຄົ້ນຄວ້າພະລັງງານແລະບໍ່ແຮ່ ໂດຍການນຳພາຂອງ ທ່ານຫົວຫນ້າສະຖາບັນ ທ່ານ ພູວຽງ ແກ້ວບຸບຜາ ເພື່ອຕ້ອນຮັບການເຂົ້າພົບປະຢ້ຽມຢາມ ຂອງຄະນະທີມອົງການ JICA. ເພື່ອປຶກສາຫາລືແລກປ່ຽນກັນ ກ່ຽວກັບໂຄງການ ການຫັນປ່ຽນພະລັງງານ ແລະ ສັງຄົມທີ່ປັດສະຈາກກາກບອນ. ພ້ອມກັນນີ້ ຄະນະທີມງານ ເພີ່ນກໍ່ໄດ້ເຂົ້າຊົມຢ້ຽມຢາມບັນດາຫ້ອງທົດລອງຕ່າງໆຂອງ ສພບ ອີກດ້ວຍ.
ໃນວັນທີ 01/06/2022 ສະຖາບັນຄົ້ນຄ້ວາພະລັງງານ ແລະ ບໍ່ແຮ່ ໄດ້ເຂົ້າຮ່ວມວາງສະແດງຜະລິດຕະພັນ ແລະ ຜົນງານ ໃນງານສະເຫຼີມສະຫຼອງວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ປະຈຳປີ 2022 ພາຍໃຕ້ຫົວຂໍ້ “ເດັກ, ເຍົາວະຊົນເປັນຄົນດີ, ຄົນສະຫຼາດປະເທດຊາດສີວິໄລ” ທີ່ວັງເຍົາວະຊົນ ແລະ ຫໍມູນເຊື້ອຊາວໜຸ່ມ, ບ້ານດົງໝາກຄາຍ, ເມືອງໄຊທານີ, ນະຄອນຫຼວງວຽງຈັນ. ເຊີ່ງໄດ້ເຂົ້າຮ່ວມງານວາງສະແດງໃນຄັ້ງນີ້ມີ ທ່ານ ພູວຽງ ແກ້ວບຸບຜາ ຫົວໜ້າສະຖາບັນ. ພ້ອມດ້ວຍຄະນະສະຖາບັນ, ຫົວໜ້າສູນ ແລະ ພະນັກງານວິຊາການເຂົ້າຮ່ວມກັນຢ່າງພ້ອມພຽງ.
ຄະນະບໍລິຫານງານ ຊາວໜຸ່ມປະຊາຊົນປະຕິວັດລາວ(ຊປປລ) ກະຊວງວິທະຍາສາດ ແລະ ເຕັກໂນໂລຊີ(ກວຕ) ໄດ້ລົງເຄື່ອນໄຫວຈັດກິດຈະກຳ “ໂຄງການນ້ອງຢາກເປັນນັກວິທະຍາສາດ” ເພື່ອເສີມສ້າງຄວາມຮູ້ ແລະ ຈິນຕະນາການກ່ຽວກັບວຽກງານວິທະຍາສາດ ແລະ ເຕັກໂນໂລຊີ ໃຫ້ແກ່ນ້ອງນັກຮຽນຊາວໜຸ່ມ-ເຍົາວະຊົນ ຢູ່ທີ່ໂຮງຮຽນມັດທະຍົມສົມບູນ ປາກຊັນ, ແຂວງບໍລິຄຳໄຊ ໃນຕອນບ່າຍວັນທີ 22 ຕຸລາ 2020 ນີ້, ຊຶ່ງນຳໂດຍສະຫາຍ ນາງ ສິລິຣັກ ໄຊຍະບຸນຊູ, ຮອງຄະນະບໍລິຫານງານ ຊປປລ ກວຕ, ສະຫາຍ ບິນລີ້ ສີສຸລາດ, ຄະນະບໍລິຫານງານ ຊປປລ ກວຕ ທັງເປັນຮອງຫົວໜ້າໂຄງການ ພ້ອມດ້ວຍທີມງານນັກວິທະຍາກອນຈາກ ກະຊວງວິທະຍາສາດ ແລະ ເຕັກໂນໂລຊີ, ມີສະຫາຍ ທະນູວັນ ວົງມະນີ, ຮອງເລຂາຄະນະບໍລິຫານງານ ຊປປລ ແຂວງບໍລິຄຳໄຊ, ບັນດາຄູ-ອາຈານ ແລະ ນ້ອງນ້ອຍຊາວໜຸ່ມ-ເຍົາວະຊົນ ຈາກໂຮງຮຽນມັດທະຍົມສົມບູນ ປາກຊັນ ເຂົ້າຮ່ວມທັງໝົດ 50 ກວ່າຄົນ.
ຈຸດປະສົງຂອງການຈັດກິດຈະກຳໂຄງການດັ່ງກ່າວ ແມ່ນເພື່ອໂຄສະນາ ແລະ ເຜີຍແຜ່ປູກຈິດສໍານຶກໃຫ້ຊາວໜຸ່ມ-ເຍົາວະຊົນ ເວົ້າລວມ, ເວົ້າສະເພາະແມ່ນ ນ້ອງນັກຮຽນຊາວໜຸ່ມ-ເຍົາວະຊົນ ໂຮງຮຽນມັດທະຍົມສົມບູນ ປາກຊັນ ໄດ້ສຶກສາຮຽນຮູ້ທາງດ້ານວຽກງານວິທະຍາສາດ ແລະ ເຕັກໂນໂລຊີ ພ້ອມທັງເປັນການສົ່ງເສີມໃຫ້ເຂົາເຈົ້າມີຈິນຕະນາການ, ມີຫົວຄິດປະດິດສ້າງທາງດ້ານແນວຄວາມຄິດການພັດທະນາໄປທາງດ້ານວິທະຍາສາດ ແລະ ເຕັກໂນໂລຊີ ທີ່ທັນສະໄໝໃນອະນາຄົດ. ພ້ອມນັ້ນ, ກໍເພື່ອສ້າງໂອກາດໃຫ້ນ້ອງນ້ອຍຊາວໜຸ່ມ-ເຍົາວະຊົນໄດ້ສະແດງຄວາມກ້າຫານ, ກ້າຄິດ, ກ້າສະແດງອອກ ແລະ ແບ່ງປັນແນວຄິດຈິນຕະນາການເພື່ອເສີມສ້າງຄວາມຮູ້ໃໝ່ໆ ກ່ຽວກັບວຽກງານວິທະຍາສາດ ແລະ ເຕັກໂນໂລຊີ.
ໃນການເຄື່ອນໄຫວຈັດກິດຈະກໍາໃນຄັ້ງນີ້, ນ້ອງນ້ອຍຊາວໜຸ່ມ-ເຍົາວະຊົນໂຮງຮຽນດັ່ງກ່າວ ໄດ້ຮຽນກ່ຽວກັບຄວາມຮູ້ພື້ນຖານຂອງນິເວດວິທະຍາ, ວຽກງານດາລາສາດ, ການທົດລອງ-ສາທິດການເກີດປະຕິກິລິຍາທາງເຄມີ, ຮຽນຮູ້ກ່ຽວກັບເຕັກໂນໂລຊີ ແລະ ນະວັດຕະກຳ, ຂໍ້ດີຂໍ້ເສຍຂອງການໃຊ້ສື່ສັງຄົມອອນລາຍ, ການນຳໃຊ້ພະລັງງານຈາກແສງຕາເວັນ, ການສຶກສາຜ່ານລະບົບອອນລາຍ ແລະ ການນໍາໃຊ້ປື້ມແບບເອເລັກໂຕຼນິກ (E-Book). ຈາກການຈັດກິດຈະກໍາຄັ້ງນີ້ເຫັນວ່າ ບັນດານ້ອງນ້ອຍຊາວໜຸ່ມ-ເຍົາວະຊົນ ແມ່ນມີຄວາມສົນໃຈ ແລະ ຕັ້ງໃຈຮັບຟັງຕໍ່ການນໍາສະເໜີຂອງນັກວິທະຍາກອນເປັນຢ່າງດີ ແລະ ໄດ້ມີການຖາມ-ຕອບ ກ່ຽວກັບບົດຮຽນທີ່ນຳສະເໜີເຕັມໄປດ້ວຍບັນຍາກາດຟົດຟືນ. ພ້ອມກັນນັ້ນ, ຍັງໄດ້ປະຕິບັດກິດຈະກຳພາກຕົວຈິງເຊັ່ນ: ສາທິດທົດລອງທາງດ້ານວິທະຍາສາດ, ຮຽນຮູ້ຕົວຈິງກ່ຽວກັບລະບົບປື້ມແບບເອເລັກໂຕຣນິກ ແລະ ໄດ້ມອບຂອງຂວັນໃຫ້ແກ່ນ້ອງນ້ອຍຊາວໜຸ່ມ-ເຍົາວະຊົນນຳອີກ.
ຂ່າວ ແລະ ຮູບພາບ: ແສງທອງ ວັນນະທຳ
ເພື່ອເປັນການສ້າງຄວາມເຂົ້າໃຈໃຫ້ແກ່ນ້ອງນັກສືກທີ່ກຳລັງຈະລົງຝຶກງານ ແລະ ຂຽນບົດຈົບຊັ້ນ, ອາຈານພາກວິຂາຟີຊິກສາດ ຄະນະວະທະຍາສາດທຳມະຊາດ ໄດ້ນຳພານັກສືກສາປີ 03 ສາຂາວັດສະດຸ ພາກວິຂາຟີຊິກສາດ, ຄະນະວິທະຍາສາດທຳມະຊາດ ມະຫາວິທະຍາໄລແຫ່ງຊາດ ໄດ້ມາທັດສະນະກັບສະຖານທີ່ຕົວຈີງ ໃນວັນທີ 6 ສິງຫາ 2020 ຢູ່ທີ ສະຖາບັນພະລັງງານທົດແທນ ແລະ ວັດສະດຸໃໝ່, ເພື່ອຮຽນຮູ້ກ່ຽວກັບເຄື່ອງມືໃນຫ້ອງທົດລອງ ແລະ ການນຳໃຊ້ຕົວຈິງ ຈຳນວນ14 ທ່ານ ແລະ ອາຈານນຳພາ 01 ທ່ານ.
ວຽກງານການຄົ້ນຄວ້າ ແລະ ພັດທະນາພະລັງງານທົດແທນ ແມ່ນວຽກງານໜຶ່ງທີ່ສຳຄັນໃນຂົງເຂດວຽກງານວິທະຍາສາດ ແລະ ເຕັກໂນໂລຊີ ເວົ້າລວມ, ເວົ້າສະເພາະກໍຄືການນຳໃຊ້ພະລັງງານແສງຕາເວັນເພື່ອຊົມໃຊ້ເຂົ້າໃນຊີວິດປະຈຳວັນ ແລະ ໂຄສະນາເຜີຍແຜ່ໃຫ້ສັງຄົມ.
ຍ້ອນເຫັນໄດ້ຄວາມສຳຄັນຂອງວຽກງານດັ່ງກ່າວນັ້ນ ຄະນະນຳຂອງສະຖາບັນພະລັງງານທົດແທນ ແລະ ວັດສະດຸໃໝ່ ກໍຄືກະຊວງວິທະຍາສາດ ແລະ ເຕັກໂນໂລຊີ ຈຶ່ງໄດ້ມີຄວາມພະຍາຍາມ, ເອົາໃຈໃສ່ ຊີ້ນຳ-ນຳພາຢ່າງໃກ້ຊິດ ຕິດແທດຕໍ່ວຽກງານການຄົ້ນຄວ້າ ແລະ ນຳໃຊ້ພະລັງງານທົດແທນ ແລະ ວັດສະດຸໃໝ່ ໂດຍສະເພາະແມ່ນການນຳໃຊ້ຜົນການຄົ້ນ ຄວ້າຕ່າງໆອອກສູ່ສັງຄົມ, ໃນທ້າຍປີ 2018 ສະຖາບັນພະລັງງານທົດແທນ ແລະ ວັດສະດຸໃໝ່, ໄດ້ມີການຕິດຕັ້ງລະບົບໄຟຟ້າແສງຕາເວັນເຊື່ອມຕໍ່ຕາຂ່າຍໄຟຟ້າໃສ່ບ່ອນຈອດລົດຂະໜາດ 30 KW ໂດຍພາຍໃຕ້ໂຄງການການຮ່ວມມືກັນກໍ່ສ້າງສູນຮ່ວມມືນະວັດຕະວັດຕະກຳທາງດ້ານເຕັກໂນໂລຊີ ວິທະຍາສາດພະລັງ ງານແສງຕາເວັນ ລາວ-ຈີນ ລະຫວ່າງ ສະພາບັນດິດຂໍ້ມູນຂ່າວສານດ້ານເຕັກນິກ ແລະ ວິທະຍາສາດ ສປ ຈີນ, ບໍລິສັດເຕັກໂນໂລຊີ ພະລັງງານທົດແທນ ຄຸນໝິງ ສປ ຈີນ ກັບ ກົມແຜນການ ແລະ ຮ່ວມມື, ສະຖາບັນພະລັງງານທົດແທນ ແລະ ວັດສະດຸໃໝ່ ຂອງກະຊວງວິທະຍາສາດ ແລະ ເຕັກໂນໂລຊີ ສປປ ລາວ.
ໃນການຕິດຕັ້ງລະບົບພະລັງງານແສງຕາເວັນໃສ່ບ່ອນຈອດລົດດັ່ງກ່າວມີເນື້ອທີ່ຍາວ 30 ແມັດ, ກວ້າງ 6 ແມັດ ແລະ ສາມາດຈອດລົດໄດ້ 10 ຄັນ, ພາຍຫຼັ້ງຕິດຕັ້ງສຳເລັດກໍໄດ້ມີການທົດລອງ ແລະ ນຳໃຊ້ເຂົ້າຕຶກອາຄານຕົວຈິງ ແລະ ໄດ້ມີການເກັບບັນທຶກຂໍ້ມູນການຜະລິດຈາກລະບົບໄຟຟ້າແສງຕາເວັນ ແລະ ການນຳໃຊ້ໄຟພ້າຈາກຕາຂ່າຍ ເພື່ອມາປຽບ ທຽບ ແລະ ຄິດໄລ່ວ່າຈະປະຫຍັດຄ່າໄຟຟ້າຈາກຕາຂ່າຍໄດ້ເທົ່າໃດ.
ຈາກລະບົບດັ່ງກ່າວສາມາດເປັນລະບົບຕົວແບບເພື່ອສາທິດໃຫ້ແກ່ອົງການຕ່າງໆ ບໍ່ວ່າຈະເປັນພາກລັດ ແລະ ເອກະຊົນທີ່ມີຄວາມສົນໃຈຕ້ອງການທີ່ຈະຕິດຕັ້ງລະບົບໄຟຟ້າແສງຕາເວັນ ເພື່ອຫຼຸດຜ່ອນຄ່າໃຊ້ຈ່າຍຈາກຕາຂ່າຍໄຟຟ້າຂອງລັດ, ຈາກລະບົບດັ່ງກ່າວໃນອານາຄົດ ທາງສະຖາບັນດັ່ງກ່າວ ຍັງຈະຄົ້ນຄວ້າວິທີການເກັບໄຟຟ້າແສງຕາເວັນທີ່ຜະລິດໄດ້ ແລະ ບໍ່ໄດ້ນຳໃຊ້ໃນເວລາວັນພັກການ ເຊັ່ນ: ວັນເສົາ, ວັນອາທິດ ແລະ ວັນພັກພິເສດຕ່າງໆ ເພື່ອຈະນຳເອົາໄຟຟ້າທີ່ເກັບໄວ້ມາໃຊ້ໃນເວລາກາງຄືນ.
